Дагъустандин Огни шагьриъ бицIи ватандашарин тешкилатарин гьял фициб вуш ахтармиш апIуз кIури, узу шагьрин ГУО-йин мектебдин улихьна вуйи образованиейин кIулин пишекар Наргиле Мягьямедовайихъди гюрюшмиш гъахьунза.

Наргиле Къурбанялиевнайи тасдикь гъапIганси, республикайин вартIан жигьил шагьриъ гъийин йигъан 1000 бицIириз йишв айи бицIидарин 6 багъ а. БицIидарин багъар гьуркIри адрувалиан, му тешкилатариъ гьамусяаьт 1354 бицIири тербия ва аьгъювалар гъадагъура. Дурарин арайиъ жикъи вахтназ вуйи дестйириъ айи 94 бицIир а. Му дестйир багъариъ тIаъна, ва дурариъ айи баяр-шубар кьюбби сменйириъра илимдин ва тербияйин серенжемариъ иштирак шула. Дурар му тешкилатариъ 3 сяаьтна гъузра, ипIруб туврадар. Мицдар дестйир аьхиримжи йисари ихь гьюкуматдиъ тешкил апIуз хъюгъна, ва дурар, бицIидар хъади гъюз, гъягъюз шлу абйир-бабариз бицIидар артмиш апIуз кюмек туври кIури, тIаънайидар ву.

Наргиле Мягьямедовайи гъапиганси, гьамусяаьт шагьриъ бицIидарин багъариз вуйи нубатнахъ 1334 бицIир дийигъна. Дурарин арайиъ 3 йислан 7 йис`ина яш айидарин кьадар 357 бицIир ву.

«Шагьриъ чарасуз вуди 2-3 бицIидарин багъар дивну ккунду. Гьелелиг му гьял дапIну ккуни месэла кIулиз адабгъуз шуладар. Тешкил дапIнайи дестйириинра абйир-бабар рази ву. Учуз мектебариъра дицдар жикъи вахтназ вуйи дестйир тIауз ккундийчуз. Анжагъ баяр-шубарихъди кьюб сменайиъ ляхин тешкил дапIнайивали кьастар кIулиз адагъуз мумкинвал туврадар»,

– давам гъапIнийи йиз сюгьбатчийи.

Шагьриъ бицIи ватандашариз вуйи тешкилатариъ, баяр-шубар артмиш хьпан бадали, вари шартIар яратмиш дапIну ккунду. Шагьрин администрацияйи, ГУО-йин начальник Максим Аьлихановди му тешкилатариз асас фикир тувра. БицIидарин вари багъариъ, ФГОС-дин программйириинди ляхин кIули гъабхури, бицIидарихъди тамши саягъниинди рякъяриъ хатIасузвал уьбхювалин, жвуван сагъламвализ фикир тувбан, экологияйиз лигбан ва ватанпервервалин, эдебнан тербия тувбан ва жара важиблу месэлйириз гизаф дикъат тувра.

Вари бицIидарин багъариъ маниди ву. Лазим вуйи рякъбан материалар, уюнжагъар а. Гьарсаб бицIидарин багъдиъ музыкайин руководитель, психолог, логопед, физкультурайин инструктор а.

«Учу гьар вахтна тербиячйирин пишекарвал за апIуз вуйи жюрбежюр серенжемарра, семинарарра кIули гъахурача. Шагьрин 4-пи нумрайин бицIидарин багъ республикайин 20 ужудар багъарин жергейиъ а. Гьацира ич шагьриъ «Кроха» кIуру хусуси багъра а. Душваъ абйир-бабари гьар вазлиъ 5 000 манат туври, 40 бицIир тербияламиш апIура»,

– давам гъапIну Наргиле Къурбанялиевнайи.

БицIидарин тербияйиз, артмиш`вализ вахтниинди фикир тувиш, гележегдиъ абйир-бабариз, тербиячйириз, мялимариз рягьятди алабхъуру. Ихь баяр-шубариз шлубкьан фикир тувуб – ихь асас вазифа вуйиб кIваинди гъибтну ккунду.