Узу, Саимат Мягьямедова, 1957-пи йисан НичIрас гъулаъ аьхю хизандиъ бабкан гъахьунзу. Учу, адашдина дадайиси, ич эмарира тербия тувдар вуча. Аьхюр-бицIириз, майил-мадатдиз гьюрмат ади, фунуб вушра ляхин, аьдатар улупури, тербияламиш гъапIунчу. Ич эмариз, имбуну вари майлариз, гъуни-гъуншйириз ва ич гъуландариз аьхю чухсагъул.

Узу 1974-пи йисан НичIрас гъулан мектебдиъ 8-пи класс ккудубкIунза. Ич мектеб гизаф инсанвал кайи, ужудар мялимар айи мектеб вуйи. Йиз сарпи мялим Жамалудин мялим вуйиз. Дугъхьан гьадмукьан гучIури шуйчуз, думу чIатариъ гъяркъишра, гьитIикIури шуйза. Адашдина дадайи мектебдиз дурушди гьич сад йигъкьан ккадапIуз гъитурдайи. Гьадрарси, аьхюну йиз гъардаш Гьямдуллагьра гъаравулси шуйи. Дурари гизаф гафар апIурдайи, анжагъ дарсар аьгъю апIин кIуйи. Думу вахтари мектебдин директорди Гага мялим лихурайи. Дугъу учуз тарихдин дарсарра киври гъахьунчуз.

Дарснаъ шликIа фицибкIа тахсир гъапIишра, дугъу гьич чIигъкьан апIурдайи. Гьадмуси имбуну вари мялимарра ужудар касар вуйи. Дурари фукьан вушра аькьюл тувунчуз. Дицдар инсанар ихь арайиан гьич кам даришри.

1978-пи йисан СикIа гъулаз швуваз гъушунза. Жвуван хизанра аьхюб ва ужуб гьюрмат айиб вуйи. 1980-пи йислан мина учу Краснодар крайин Армавир шагьриъ яшамиш шулача. Учухъди сабси мушваъ табасаранарин 15-дихьна хизанар албагну, сар-сарихьна гьюрмат ади, сатIиди дуланмиш шула. Дурариз варидиз ужудар хъуркьувалар ккун апIураза. Варидариз Аллагьди кюмек туври».

Саимат Мягьямедовайи шиърарра дикIура, исихъ дугъу хътау шиърарикан саб чап апIурача.

Багъри Ватан

Зат кIваълан гъягъюрдар ич Кьалухъ дагълар,

Аьтирин ниъ хъайи хярар, багълар,

Аьхю гьядисйир гъахьи марцци йишвар,

КIваз гирами инсанар айи гъулар.

Фукьан аьламатнан дюн’я му дарин,

Ватандихъ юкIв хъмиди мягьрум шулдарин?

Гизаф марцци гьава айи йишв дайин,

Бабкан гъахьи юрд, гьич кIваълан гъябгъюрин?!

Ав, гъи ухьу варибдиз аьгь апIурхьа,

Сабурлувал мюгькамди уьбхюрхьа.

Сар Аллагьу Тяаьлайиз гьаммишан,

Гъачай, умунди ккарагури гъузрухьа