1-пи сентябрь – мектебдиъ аьгъювалар гъадагъру эвел – инсандин уьмриъ важиблу вахтарикан саб ву. БицIидар кIвак гъалабулугъвал кади, му йигъ улубкьайиз хайлин вахт ккимиди ккилигури шулу. Мектебдиз сабпи ражари гамар алдагъу бицIирин думу йигъ фукьан акуб, шаду гьиссари абцIнайиб гъабхьиш, дугъан кIваъ мектебдикан гьадмукьан мани гьиссарра гъузру.

Мектебариъ аьгъювалар гъадагъбан сабпи йигъ аьхирихъна гъафиган, узу жюрбежюр йишвариъ яшамиш шулайи табасаран ватандашарин хизанариан сабпи классдиз гъушу бицIидарихьан мектебдикан ва чпин сабпи дарснакан гьерхбар гъурхнийза. Дурарикан бязи баяр-шубари туву жавабарихъди учвура таниш апIураза.

Алия Абачева, Дагъ.Огни шагьур, 4-пи нумрайин мектеб, 1-пи “в” класс

– Узу 1-пи сентябрь улубкьбаз ухдитIан ккилигурайза. Дадайи узуз гизаф цIийи мутм-йир ва палат масу гъадагъруган, кIваантIан разиди вуйза. Узуз вари кьабулди вузуз, хъа варитIан гизаф кьял’ин иливру чанта кьабул гъабхьнийиз.

Мектебдиз вари дабалг- ну ва цIийи палат алабхьну дуфнайи. Варидарихь кюкдин кунцIар хьайи. Узура йиз кунцI мялимдиз багъиш гъапIнийза. Дугъу узлан хил алдабгъну ва «чухсагъул, йиз риш» гъапну. Классдиъ учу шиърар гъурхнийча. Дюзди гъапиш, варитIан ужуди узу гъурхнийза. Кьюбпи дарснахъан мялимди учу столовая-йиз хъади гъушну. Гьадушваъ тIанжир али гречкайин аш гьивнийчуз. Шубубпи дарснахъан учу хулариз деетну. Мектебдиъ сабпи йигъ гизаф кьабул гъабхьунзуз. Узу дарсар хьубариз урхурза.

Аьлиасгьяб Къазиев, Мамедгъала поселокдин М. Аьлиевдин ччвурнахъ хъайи гимназия, 1-пи “б” класс

– Узу мектебдиз сабпи ражари гъушунза. Мектебдин гьяятдиъ линейка гъябгъюрайи. Душваъ ученикари шиърар гъурхну ва милли палат алабхьнайи бицIидари ялхъвнар гъапIну. Вари бицIидар дабалгну, цIийи палтар алди дуфнайи. Мектебдин директори учуз тебрикнан гафар гъапну ва гележегдиъ хъуркьувалар ккун гъапIну. Линейкайин кьяляхъ учу ич мялим Сяида Мягьямедовнайи классдиз хъади гъушнийи ва партйирихъ дитнийи. Сабпи дарснаъ дугъу учуз Ватандин Аьхю дявдикан, ихь ватан гъюбхю игитарикан, ветеранарикан ктибтнийи. Кьюбпи дарснаъ классдиз полицияйин участокдин гъуллугъчи гъафнийи. Дугъу учуз, дадайихъ хъебехъай, ялгъузди дадайихьан ярхлаз мягъянай, гъапну ва рякълан улдучIвруган, светофориз фикир тувну ккунивалин гъавриъ тIаъну. Мялимди партайихъ деъбан къайда улупнийчуз. Дарснаъ артухъ гафарра дапIну ккундар. Кьюбпи дарснахъан мялимдихъди буфетдиз гъушнийча. Гьадушваъ борщ ва дюгдин аш гьивнийчуз. Компотра айи, амма думу убцруб вуйи, гьаддиз ухуз гъабхьундайзухьан. Мектебдиъ учуз хулан ляхин тувну. Закуриз узу шикил абк- ну ккунду. Узуз мектебдиъ вари кьабул гъабхьунзуз, мялимра, буфетра, классра. Узу Нефтуллагь кIуру балихъди таниш гъахьунза.

Аьйша Гьяйдарялиева, Каспийск шагьур, 9-пи мектеб, 1-пи “а” класс

– Йиз фикрариъ мектеб аьхю ва успагьи дарамат вуйи. Гьякьикьатдиъ думу йиз фик-рариъ айибтIан лапра аьхюб ва успагьиб гъабхьну. ВаритIан гизаф узуз ич класс кьабул гъабхьнийзуз. Думу жюрбежюр рангнан шарар китIну дабалгнайи. Ич мялимдиз Ума Жамаловна кIуру. Думу гизаф ужур, чакан тина манишин туврур ву. Мялимди учуз сабпи классдин ученик вуйивал тасдикь апIру шагьадатнамйир пай гъапIнийи. Узу ич классдин швнур-сар шурахъди таниш гъахьунза. Сабпи йигъан мектебдиъ учу дургъунагъариз жавабар агури ва тамаши апIру къайдайиинди дарсариъ иштирак гъахьунча. Узу закурра аьшкьниинди мектебдиз гъягъюрза.

Ишарат Тагъиева, Хив район, Мажвгул гъул, 1-пи класс

– Учуз мектебдиъ дарсар ккергъайиз кьюб гьяфта улихьна дих гъапIнийи. Гьаддихъанмина учу ич сарпи мялим Мислимат Ярягьмедовнайихъди мектебдиъ ача. Гьаму йигъари учу математикайиан ва урус чIалнаан аьгъювалар гъадагъури гъахьнийча. Гъи гьадму аьгъювалари узуз аьхю гьиишин тувра. Классдиъ узухъди 17 ученикди урхура. Учуз жара дапIнайи классра акуб ва уткануб ву. Душваъ компьютер, интерактивдин доска, ноутбукар а. Китабарра гьуркIну ачуз. Ич мялимди учуз мектебдин айитI экскурсия тешкил гъапIну. Мектебдиъ столовая, библиотека, “Точка роста”, технологияйин, музейин кабинетар а. “Точка роста” кабинетдиъ айи аьламатнан деврин принтер, дронар кьабул гъахьунзуз. Узуз мектебдиз гъягъюз, аьгъювалар гъадагъуз гизаф аьшкь дубхьназуз.

Рябкъру гьялариан, сабпи ражари мектебдиъ аьгъювалар гъадабгъбан сабпи дарсназ гамар алдагъу ихь наслин вакилариз мектебдиъ кьабул гъабхьну. Гъит, дурар улихьди, мектебдиз гъушу ихь вари баяр-шубарин рякъ ягъурлуб, хайирлуб ва чпин кIваъ айи мурадарихъ хъуркьруб ибшри.