РФ-дин Конституцияйиъ дигиш’валар тIаъбан метлебниинди сентябрь вазлиъ кIули гъуху сечкйирин гьякьнаан «Саб вуйи Урусат» партияйин РД-йин политсоветдин президиумди гъубху заседаниейиъ Дагъустандин Халкьдин Собраниейин председатель Хизри Шихсяидовди, улупнайи сечкйир райондин сяргьятариин заан тешкилулвалиинди гъахувализ лигну, Хив райондин глава Ярмет Ярметовдиз чухсагъул мялум гъапIну.

Дупну ккундуки, Хив район республикайиъ сечкйир ужуб иштирак’вал ади кIули гъуху 9 райондин сиягьдиъ а.

Район тялукь дережайиинди лишанлу апIбакан улхури, Ярмет Ярметовди райондин жямяаьтлугъдиз чухсагъул мялум гъапIну.

- Конституция – фунуб гьюкуматдинра асас къанун ву. 90-пи йисари кьабул гъапIу му къанундиъ, гьелбетда, деврар гьюдюхбан натижайиъ дигиш’валар тIаъбан игьтияжра дубхьнайи.

Гьякьикьатдиз дугъри кьимат тувну, Конституцияйиъ дигиш’валар тIаъбан тереф гъюбхю райондин гьарсар агьалийиз аферин пуз ккундузуз. Му сечкйириъ Хив райондин 90%-тIан артухъ агьалйири чпин ватандаш’валин буржи тамам гъапIну. Лазим герендиъ тялукь дережайиинди сатIи хьувал жямяаьтлугъдин сабвалин лишан ву.

Сечкйир заан дережайиинди кIули гъахбаъ асас роль УИК-арин вакилари уйнамиш гъапIну. Коронавирус уьзри ихь яшайишдиъ тIау дигиш’валариз дилигди, улупнайи муддатнаъ дурари ва полицияйин гъуллугъчйири cечкичйирин хатIасузвал уьбхбан рякъ’ан натижалу зегьмет гъизигну. Варидариз чухсагъул мялум апIураза, - аьлава гъапIну Ярметовди.