Думу заседаниейиъ Табасаран райондин 2021-пи йисаз вуйи бюджет кьабул гъапIну.
Заседание райсобраниейин председатель Иса Исаевди кIули гъубхнийи.

Райадминистрацияйин финансарин отделин кIулиъ айирин вазифйир тамам апIурайи Сейфуллагь Рашидовди депутатар Табасаран райондин бюджетдиъ дигиш'валар тIаъбан гьякьнаан вуйи къарарихъди таниш гъап1нийи. Дидиз асас вуди, 2021-пи йисаз вуйи бюджетдин кьадар 1 428 230 094 агъзур манат, 2022-пи йисаз – 1 359 236 649 агъзур манат, 2023-пи йисаз – 1 359 643,453 агъзур манат хьибди.

Собраниейин депутатари гьацира райондин гюзчивалинна гьисаб апIбан органдин 2021-пи йисаз вуйи планра тасдикь гъапIну. КСО-йин пландиз асас вуди, 2021-пи йисан Табасаран райондин 57 идарайи гъапIу ляхин ахтармиш апIиди, гьадму гьисабнаан 24 образованиейин идарйирин, 20 бицIидарин багъарин, 10 гъуларин поселенйирин советарин, «Табасарандин сес» газатдин редакцияйин, МКУ ЕДДС ва «СатIи дапIнайи бухгалтерия» МБУ-йин ляхин.
Заседаниейиъ депутатар райондин образованиейин гъурулуш артмиш апIбан программйирихъдира таниш гъапIнийи.

Образованиейин управлениейин начальникдин замес-титель Бахиш ТIагьировдин туву мялуматариинди, райондин образование улихь гъябгъбан бадали, 2021-2024-пи йисариз вуйи муниципалин программа гьязур дапIна. Дидин дахилнаъди уьмриъ кечирмиш дапIну ккуни 7 программа а: 1. «Мектебдин яшнакк ккуркьну адрударин образованиейин гьякьнаан»; 2. «Мектебарин ляхин улихь гъябгъбан гьякьнаан»; 3. «Мялимдин ад за апIувалин гьякьнаан»; 4. «Мектебдиъ дару образование тувбан гьякьнаан»; 5. «Зигьимлу бицIидар»; 6. «БицIидар вердиш апIбан гьякьнаан»; 7. «Образованиейин тешкилатар уьрхювалин гьякьнаан».

«Образование» кIуру милли проектдиъ «ЦIийи мектеб», «Гьарсар бицIирин хъуркьувал», «БицIидар айи хизанариз кюмек апIувал», «Гележегдин мялим» ва гьацира жара программйир а. Гьарсаб программа уьмриз кечирмиш апIуз муниципалин, региондин ва федералин бюджетариан жара апIру пулин кьадарра улупна.
Заседаниейиъ гъитIибкку сабсан месэла – Табасаран райондиъ 2021-2023-пи йисари туризм артмиш апIбан гьякьнаан вуйи.

Райондин культурайин, спортдин, туризмдин ва жигьиларин парламентдин начальникдин вазифйир тамам апIурайи Садикь Уьсмановди туву мялуматариинди, «Табасаран райондиъ 2021-2023-пи йисари туризм артмиш апIувал» ччвур тувнайи муниципалин метлебнан программа кьабул дапIна. Му программа уьмриз юрутмиш апIбан бадали, Табасаран райондин бюджетдиан 1,5 миллион манат лазим ву: 2021-пи йисаз – 0,5 млн, 2022-пи йисаз – 0,5 млн, 2023-пи йисаз – 0,5 млн манат. Республикайин бюджетдиан 2021-пи йисаз пул деебтнадар, хъа 2022-2023-пи йисариз – гьар йисаз кьюдваржна хьуцIур агъзур манат жара апIиди. Бюджетдиан дару мяднари 168,5 миллион манат тяйин апIура, 2021-пи йисаз жара апIру дакьатар адар, хъа 2022-пи йисаз – 23 млн, 2023-пи йисаз – 50 млн манат жара апIиди.

Му муниципалин метлебнан программайин дахилнаъди саб жерге проектар гьязур дапIна, гьадарарин цIарнаъ, 20 касдиз ляхнин йишвар ади, Хючнаъ ТРК «Рубас» тикмиш апIбан (10,5 миллион манат улупна); 35 касдиз ляхин апIру йишвар ади, Хючна гъулаъ пионерарин лагерь цIийикIултIан гъурмиш апIбан (7,5 млн манат); 40 касдиз ляхин апIру йишвар ади 50 касдиз дахъру йишвар айи хялар кьабул апIру гостиницйир тикмиш апIбан (50 млн манат); 3 касдиз лихру йишвар ади, Пилигъ, Хили-Пенжигь, ТинитI, СиртIич гъулариъ туристариз балугъар дисру йишвар гьязур апIбан (1,5 млн манат), 2 касдиз ляхин апIру йишвар ади, Хючна гъулаъ туриствалинна мялуматарин центр ачмиш апIбан (1,0 млн манат), Гъулли ва Кувагъ гъулариъ, 20 касдиз ляхнин йишвар ади, туристариз рягьятвал гъадабгъру йишвар тикмиш апIбан (100 млн манат) проектара. 120 касдиз ляхнин йишвар ачмиш апIуз мумкинвал туврайи му проектар уьмриз юрутмиш апIбан бадали, 170,5 млн манат лазим хьибди.

Туризмдихъди аьлакьалу вуйи инвестицйирин программайин метлеб – 2023-пи йисаз райондиз 9,6 агъзур турист жалб апIувал ву.
Заседаниейиъ гьял гъапIу вари месэлйирин гьякьнаан тялукь къарарар кьабул гъапIнийи.