Дупну ккундуки, гъубшу йис варидариз гизаф гъагъи йис гъабхьну. КIулди вари дюн’я вуйиганси тарабгънайи, гьеле ужуди ахтармиш дапIну адру уьзри вари халкьариз, гьадму гьисабнаан табасаран халкьдизра, гизаф дердар, аьзабар, бедбахтвалар, хажалатар гъахну, хайлин инсанар ихь арайиан гъухну. Му къурхулу уьзрин кум ктрубкIу хал-хизан ихь арайиъ имдаршул. Гьаму аьгьвлатнаъ варитIан гизаф читинвалар алахьу, аьхю гьюрматназ лайикь гъахьи касар медицинайин гъуллугъчйир ву. COVID-19 уьзрихъди вуйи женгнаъ варитIан кIакIнаъ дийигъну, дурари агъзрариинди ихь ватанагьлийирин сагъламвал ва уьмур уьрхбаъ фидакарвалиинди зегьмет гъизигну ва гьамусяаьтра зигура. Гьяйифки, дурарикан хайлиндари му барабарсуз женгнаъ ватанагьлийир бадали чпин уьмрар тувну. Дурар гъийин деврин игитарси гьисаб апIуз шулу.

Амма уьмур саб йишв’ин дийибгънадар, думу гьяракатниинди ахмиш шула. Гьаддиз ухьу, му кьутIкьли бедбахтвалра хъютIюбкьну, улубкьу ЦIийи йисаъ инанмишди кьадамар алдагъури учIвну ккунду. Гъит улубкьу ЦIийи йис му тIягъюн бугъмиш апIру, цIийи дигиш’валар айи, ислягьвал хру, саламатвалихъди, аваданвалихъди аьлакьалу йис ибшри!

Улубкьу 2021-пи йис ихь халкьдиз ягъурлуб хьувал кIваантIан ккун апIурача! Ихь халкьдиз сагъ-саламатвал ибшри, гьарсаб табасаран хизандиъ бахт, кIван шадвал, берекет, девлет кам даришри. Гъит улубкьу йисан гьарсар табасаранлуйин ккергънайи ужудар ляхнар, варитIан тамарзу хиялар, фикрар, ниятар кIулиз удучIври, гьарсар касди учв варитIан бахтлу вуйивал гьисс апIри!

Ичв ЦIийи йис мубарак ибшри, аьзиз дустар!