Понедельник, 26 сентября 2022, 21:26

Войдите в свой аккаунт

Пользователь
Пароль
Запомнить меня

Ухьу фила уягъ хьиди?

Автор Гюлягьмад Маллялиев Воскресенье, 17 января 2021, 09:31 673

 

Январин 3-диъ Мягьячгъала шагьрин дахилнаъ айи Тарки поселокдиан чIуру хабар гъафнийи – 23 йисаъ айи Вали Аьбдурягьимов гьадму поселокдиан вуйи жара жигьили винтовкайиан йивну гъакIну. Хъа кьюд йигълан му гъулаъ сарсан жигьил уьмрихъ мягьрум гъапIну – спортсмен Керим Хайруллаев.

 

Гьамус варибдикан хъайи-хъайиси.
Къанна шубуд йисан яшнаъ айи, наркотикариз аькси вуйи тешкилатдин вакил Вали Аьбдурягьимовди Таркийиъ аргъаж шулайи жигьил насил наркотикар ишлетмиш апIбак каърайи ва дурарин гъюзимбу уьмур пуч апIурайи касарихъди хайлин вахтна женг гъабхури гъахьну. Дугъу жямяаьт уч духьнайи йишвахь, му чиркин ляхин тешкил дапIнайирин ччвур саб-швнубан ачухъди кIури, дугъан ляхнарин улихьишв гьадабтIбан бадали, гъуландар жалб апIури гъахьну. Амма дугъаз я ерли администрация-йин, я гъулан агъсакъларин терефнаан кюмек гъабхьундар. ДумутIанра савайи, наркотикар масу тувувал тешкил дапIнайи Уллубий Амировдин терефкрари думу саб ражари яманди гъурччвнура вуйи.

АйтIан ляхнарин органариъ лихурайи Уллубий Амировди, чан гъуллугънан мумкинвалар ишлетмиш апIури, наркотикар масу тувбиин машгъул духьнайидар чан хиликкна гъадагъну ва дурарин даягъ гъахьну. Дугъан кюмек гьисс апIури, наркотикар масу тувбиинди рягьят гъазанжар гъадагъурайидари чпиз гаф-чIал кIурудариз гучIар ккаъри гъахьну.

3-пи январиъ Амировдин терефкар Жамалудин Болатхановди чан дакк-нишин айи Вали Аьбдурягьимовдихъди нубатнан ражари гъалмагъал гъапIну, ва винтовкайиан кьюб гюлле йивну, думу гъакIну.

Му вакьиайи Таркийиъ гъургъулагъ ипну. Хъял дуфнайи ерли агьалйир, аьгьвалат гьял апIбан бадали, уч хьуз хъюгъну. Гьаму вахтна, Амиров хулаз дуфна кIури, хабар гъеебхьу 15-20 жигьил дугъан хуларихьна диш гъахьну. Мушваъ Уллубийин мирас Жабраил Амировди спортсмен Керим Хайруллаевдин фуниъ гаркIал убччвну, ва спортсмен больницайиъ кечмиш гъахьну.

Сифте, кичIихнайидар жара апIурайиган, Керим Хайруллаевдиз хабарсузди зиян гъабхьну кIури, хабар удубчIвнийи. Хъа сакьюд йигъарилан, учв йикIайиз улихьна, Хайруллаевди чан дустраз хътапIу дихнан смс-диан мялум шулайиганси, думура наркотикар тарагъурайидариз къаршуди удучIвнайир вуди гъахьну. Гьаддиз Амировдин терефкрари думу гъядауз кьаст гъапIнийи.
Аьдат вуйиганси, му гьядисйирин кьяляхъ, республикайин жюрбежюр гьюкмарин, тялукь министерствйирин вакилар, имамар, жямяаьтлугъ касар, саб дупну нивкI'ан хъергганси, поселокдиз гъя-гъюри, ерли агьалйирихъди гюрюшмиш шули, гаф-чIал апIуз хъюгъну.

Гьаци, 8-пи январиъ Тарки поселокдин мистаъ ерли жямяаьтдихъди Мягьячгъалайин мэр Салман Дадаев гюрюшмиш гъахьну, ва гъалмагъалин кьюбиб терефарихьнара илтIикIури, гъярхьувалар дерккбан бадали, гъулан имамди ва агьли касари гъапIу мясляаьтниин вари рази духьну ккуниваликан гъапну. Ерли жямяаьтдин вакиларихъди РД-йин Жямяаьтлугъ палатайин, жигьиларин ляхнариз лигру министерствойин ва гь.ж. вакилар гюрюшмиш гъахьнийи.

Тарки поселокдин имамди, аьхирки, къарар адабгъну – жигьилар йивну гъийихдарин хизанар ва Уллубий Амировдин хизан, аьгьвалат сикин хьайиз гъул'ан адаувал. Учв Амиров, агбанна ахтармишарин серенжемар гъахурайи вахтна, наркотикар хьади гъидисну, хъа Жабраил Амиров ва Жамалудин Болатханов чпин суд хьайиз СИЗО-йиъ ккилигура.

Тарки поселокдин имамдин къарарну республикайин жямяаьт кьюб йишваз пай гъапIнийи: сарпидари, му лайикьлу жаза ву, фицики хизанариз чпин баяри фу апIураш аьгъдарди хьуб мумкин дар, жвуваз девлет шулу кIури, жарадарин веледарин уьмрар пуч апIуз хай даршул, кIурайи; кьюрпидари – ихтиярар уьрхру гьюкуматдиъ яшамиш шулайиган, тахсиркрариз къанундиинди жаза тувну ккунду, улихьгандин аьдатариинди ваъ, кIури, наразивал улупурайи. "Жямяаьтлугъ тешкилатари ва имамари къанун уьбхру органарин ва ерли гьюкмарин вазифйир чпиина гъадагъну ккундар", – му къарарин гьякьнаан вахтназ вуди милли политикайин ва динарин ляхнариз лигру министрин вазифйир тамам апIурайи Энрик Муслимовдира чан фикир ачмиш гъапIнийи.

Тарки поселокдиъ гъахьи гьядисйири хайлин суалар арайиз хура. Къанун уьбхру органари ва ерли гьюкмари наркотикар масу туврайидарин къанунсуз гьяракатарин улихьишв вахтниинди гьаз гьадабтIундар? Вали Аьбдурягьимовди саб-швнубан му месэла гъитIибккури гъахьнушра, гьаз ерли жямяаьтди чав, фукIа дархьиганси, гъабхури гъахьну? Гьаз айтIан ляхнарин органарин вакиларин шил къанунсуз ляхнаригъ, иллагьки наркотикар масу туврудар къанундиъ улупнайи жазайихьан азад апIувалин (гьелбетда, жвуваз файда кади) ляхнаригъ, кми-кмиди ашкар шула?

Таркийиъ гъахьидарсдар гьядисйир ихь республикайиъ гъи цIиб алахьурайинхъа? Жвуваз гъазанжар бадали, ерли агьалйир къалп ичкийихъди тямин апIурайидар, мектебарин багарихь жюрбежюр наркотикар кайи сурсатар масу туврайидар, Каспийск шагьриъси, агьалйир штухъди тямин апIурайи гъанавдизди хусуси карханйирин ва гьяжатханйирин чиркин штар деетурайидар... Му жюрейин гьядисйир гизаф ктухуз шулу, ва дурарин натижайиъ агьалйир я уьмрихъ мягьрум шула, ясана дурарин сагъламвализ зарар шула.

Тарки гъулан жямяаьт кьанди вушра, аьхю кьимат тувну – кьюр жигьил касдин уьмрар гъурбан дапIну – нивкI'ан хъебгну. Хъа имбу гъуларин ва шагьрарин жямяаьтар, ухькан гьарсар, фила хъергди? Филадиз ухьу, ихь улихь чIуру ляхнар апIурайидар рякъюрашра, ил гъибисдарси, гъузди?! Дарш, ухьуз эсир апIбан бадали, цIийи аьжалар лазим вуйин?

Оцените материал
(1 Голосовать)
Последнее изменение Пятница, 15 января 2021 16:38

ПОСЛЕДНИЙ НОМЕР

Свежий выпуск

Вакцинация

В сентябре стартует прививочная кампания против сезонных инфекций

сен 19, 2022 Вакцинация

...................................................................................................

Большая часть населения Дагестана нуждается в ревакцинации

сен 16, 2022 Вакцинация

...................................................................................................

В Дагестане около 20 медучреждений развернули ковидные госпитали

авг 28, 2022 Вакцинация

...................................................................................................

Меры профилактики коронавируса обсудили в МФЦ Дагестана

авг 21, 2022 Вакцинация

...................................................................................................

Читайте также

Комбат ДНР:Мобилизированных россиян могут направить на освобожденные т…

сен 26, 2022 Общество

...................................................................................................

Сергей Меликов выразил соболезнования семьям погибших школьников в Иже…

сен 26, 2022 Общество

...................................................................................................

Мизулина заявила, что митинги в Махачкале координировались извне

сен 26, 2022 Политика

...................................................................................................

Энрик Муслимов призвал дагестанцев не поддаваться на провокации врагов

сен 26, 2022 Общество

...................................................................................................

В Буйнакске готовятся к открытию сразу 3 детских сада

сен 26, 2022 Образование

...................................................................................................

Информация

Как получить НСУ?

сен 26, 2022 Информация

...................................................................................................

Разъяснение норм федерального законодательства об ответственности за о…

сен 23, 2022 Информация

...................................................................................................

Памятки по маркерам употребления психоактивных веществ родителями обуч…

сен 23, 2022 Информация

...................................................................................................

ОБ ОТВЕТСТВЕННОСТИ ЗА НЕЗАКОННОЕ КУЛЬТИВИРОВАНИЕ НАРКОСОДЕРЖАЩИХ РАСТ…

сен 23, 2022 Информация

...................................................................................................

В ЮФО начал работу некоммерческий Центр поддержки культурных индустрий

сен 23, 2022 Информация

...................................................................................................

GOOGLEPLEY

Top.Mail.Ru
Рейтинг@Mail.ru Яндекс.Метрика

© 2014 ГБУ РД "Редакция республиканской газеты "Зори Табасарана". Все права защищены. Учредитель: ГБУ РД "Редакция республиканской газеты "Зори Табасарана". Сетевое издание "Зори Табасарана" зарегистрировано в Федеральной службе по надзору в сфере связи, информационных технологий и массовых коммуникаций (Роскомнадзор) 02 ноября 2020 года. Свидетельство о регистрации Эл № ФС77-79462. Возрастное ограничение 6+

Главный редактор Маллалиев Гюлахмед Нуралиевич