Республикайиъ мициб аьгьвалат гъябкъиган, гьадмуган Дагъустандин Главади лихури гъахьи Владимир Васильевди региондиъ 2018-пи йисхъан мина «100 мектеб» кIуру проект уьмриз кечирмиш апIбан жягьтлувал улупну. Гьаддихъан мина 3 йисандин арайиъ республикайин саки вари муниципалитетариъ 470 йирси мектебар цIийи алаъну.

Му проектдин асас метлеб – йирси мектебар рас дапIну, цIийи алаъну, душвариъ урхурайи бицIидариз ужудар шартIар тешкил апIувал ву. Гьаму ляхнар кIули гъахуз республикайин бюджетдиан гьарсаб рас апIурайи мектебдиз 2 миллион манат жара апIура, хъа харж шлу имбуну дакьатар – меценатарин кюмек ва райондин бюджетдиан духьну ккунду.

Магьа ццира РД-йин экономикайинна аьтрафарин артмиш’валин министерствойи «100 мектеб» проектдин конкурсдиз аьрзйир кьабул апIуз хъюгъну. Аьрзйир ццийин 20-пи январиан 25-пи мартдизкьан кьабул апIиди.

Республикайин экономикайинна аьтрафарин артмиш’валин министерствойин пресс-гъуллугънаан туврайи мялуматариинди, цци му проект уьмриз кечирмиш апIуз республикайин бюджетдиан 200 миллион манат жара дапIна.

Къайд апIуб лазим вуки, мидиз улихьна йисариси дарди, цци конкурсдиъ иштирак хьуз аьрзйир тувбан къайда цIиб дигиш гъапIну. Дигиш'вал гьаддиъ аки, РД-йин образованиейинна илимдин министерствойи гьар йисан гьязур апIурайи, бинайиан рас дапIну ккуни мектебарин сиягьнаъ адру образование-йин идарйириз цци «100 мектеб» проектдин конкурсдиъ иштирак хьуз ихтияр адар.

Гьаддиз региондин экономикайинна аьтрафарин артмиш’валин министерствойи конкурсдиъ иштирак хьуз гьязур шулайи мектебарикан, улупнайи дигиш’валариз фикир тувну, лазим вуйи вари документар гьязур дапIну, кьан дарапIди аьзйир тувуб ккун апIура.

Эгер учвуз му месэлайин гьякьнаан хъанара артухъ мялуматар лазим вуш, 100school.e-dag.ru сайтдиан урхуз шулу, вая республикайин экономикайинна аьтрафарин артмиш’валин министерствойин кIулин эксперт Арсен Рягьимовдиз ясана отделин начальник Марат Аьбдулгьямидовдиз телефондин гьаму нумрайиз 8(8722)68-01-34 зенг апIуз ихтияр а.