Версия для печати

Дадайин чIал – багьалу савкьат

Автор Зубайдат Шябанова Пятница, 12 апреля 2019, 09:18 132
Дадайин чIал – багьалу савкьат
||| ||| |||

Гьаму йигъари «Табасарандин нурар» газатдин редакцияйиъ «Йиз дада дюн’яйиъ варитIан ужур ву» конкурсдин гъалибчйириз пешкешар тувбан серенжем кIули гъубшну.

Серенжемдиъ РД-йин Халкьдин Собраниейин депутат Алавудин Мирзабалаев, РД-йин писателарин Союздин табасаран секцияйин кIулиъ айи Сувайнат Кюребегова, писатель, публицист Рашид Аьзизов, РД-йин Главайин ва Правительствойин Администрацияйин мялуматарин политикайин Управлениейиъ лихурайи Артур Аскеров, конкурсдин гъалибчйир, иштиракчйир, дурарин абйир-бабар, бабан чIалнан дарсар кивру мялимар иштирак гъахьну.

Серенжем ачмиш апIури, «Табасарандин нурар» газатдин кIулин редактор Гюлягьмад Маллялиевди къайд гъапIганси, конкурс ккебгъну имиди дидин иштиракчйирин жанлувал зяифуб вуйи. Хъа интернетдин социалин сетариан конкурсдин гьякьнаан мялумат гъеебхьиган, республикайин мектебариъ урхурайи баяр-шубарихьан 50-тIан артухъ сочиненйир гъафну. Дугъу чан ва газатдин коллективдин терефнаан мялимариз, конкурсдиъ иштирак гъахьи баяр-шубариз чухсагъул мялум гъапIну.

Хъа редакцияйиз хътау сочиненйирин ери гьисабназ гъадабгъуруш, дадайихьна вуйи рафтар, гьиссар, жвуван манишин гьатIабццну, лайикьлуди улупуз тек-бирра баяр-шубарихьан дархьиваликан, вари сочиненйир саб-сабдиз ухшар айидар вуйиваликан улхури, газатдин кIулин редактори, табасаран чIал киврайи мялимарикан баяр-шубарихъди артухъди ляхин гъабхувал ккун гъапIнийи.

Алавудин Мирзабалаевди бабан чIалнаан вуйи конкурсариъ иштирак шулайи бицIидариз, мектебдин мялимариз чан терефнаан аферин мялум гъапIну. «Баяр-шубарин фикриъ гъаммишан дада, хъа дадайин – гьаммишан баяр-шубар ади шулу. Дадаси, ухьу фикриъ ихь багъри чIалра дюбхну ккунду. Гьаз гъапиш, чIал ихь халкьдин, хизандин, миллетдин варитIан багьалу савкьат гьисаб шула», – къайд гъапIну депутатди.

Сувайнат Кюребеговайи ва Рашид Аьзизовди мялум гъапIганси, гъи дюн’яйиъ хайлин милли чIалар зяиф шула, дургура. Дурарин фикриинди, му лянин асас себебарикан садар вуди технологйирин цIийи девир улубкьнайивал, жигьилар гъулариъ яшамиш шули гъудрузрайивал, саб миллетдин вакилар чиб-чпихъди вая чпин хизанариъ бабан чIалниинди дулулхрайивал ва гьацдар жарадар улупуз шулу. ЧIалнан устадари уч духьнайидариз бабан чIалнан деринваликан, успагьиваликан, дидиз айи яркьу, амма ухьу варидари ишлетмиш дарапIрайи мумкинвалирикан ктибтнийи.

Серенжемдин аьхириъ конкурсдин гъалибчйир дипломариинди ва пулин пешкешариинди лишанлу гъапIнийи.

Газатдин редакцияйин коллективди конкурсдин гъалибчйир лишанлу апIуз кюмек туву касариз – Табасаран райондин глава Мягьямед Къурбановдиз, РД-йин Халкьдин Собраниейин депутат Алавудин Мирзабалаевдиз, Дагъустандин Главайин ва Правительствойин Администрацияйин руководителин заместителди лихурайи Нюсрет Уьмаровдиз – кIваантIан чухсагъул мялум апIура.

P.S. КIваин апIурача, конкурсдиъ пешкешнан йишвар гъадагъу Сабина Эскеровайиз (ТIюрягъ, 2-пи класс) ва Малика Нежефовайиз (Мажвгул, 10-пи класс) пешкешар тувабн бадали газатдин редакцияйиз дих апIурача.

Оцените материал
(1 Голосовать)