Улихьнаси «Табасарандин нурар» газатдин редакцяйиз Акбар Гьяжиэкперов, Эльдар ТIагьиров, Имран Исрафилов хялар гъахьнийи. Му баяр, ММА-йиин машгъул духьну, ужудар хъуркьувалар улупбан рякъюъ а. «Табасарандин нурар» газатдин журналистари жигьиларихъди дурарин хъуркьуваларикан, гележегдиз айи планарикан, спортдин му жюрейиин машгъул вуйивалихъди аьлакьалу вуди дурариз алахьурайи читинваларикан маракьлу сюгьбат гъубхнийи.

Акбар Гьяжиэкперов: «Йиз абйир-бабар Яракк гъул’ан вуйиз. Аьхиримжи шубуд йисан узу Мягьячгъалайиъ, «Чемпион» кIуру клубдиъ тренер Эседуллагь Эмирагъаевдихъди кчIихбарин техника артмиш апIури, гьадушваз гъюрайи жара спортсменарихъди тренировкйир гъахураза. 2015-пи йисхъан мина, пишекар спортсменси, жюрбежюр кчIихбариъ иштирак шулаза. Талитариъ 11 ражари иштирак духьну, 10 ражари гъалиб, саб ражари магълуб гъахьунзу. Гьаму апрелин 11-пи йигъаз Хабаровскдиъ панкратиондиан саб талит планламиш дапIнайиз, сагъламвалин терефнаан манигъвал дубхьну, талитназ удучIвундарза. Саб гьяфтайиъ рягьятвал гъадабгъураза. Хъа улихьди гъадагъу хъуркьуваларикан улхуруш, кьюб ражари Урусатдин талитариъ гъалиб гъахьунза, панкратиондиан дюн’яйин кубок, кчIихбарин самбойиан гъалибвалар гъадагъунза. Спортсменари чиб чпин гъалибваларикан ктибтури аьдат дар, гьаддиз му темайиан гизаф улхуз ккундарзуз».

Эльдар ТIагьиров: «Узу Рубас гъулаъ яшамиш шулаза, ЧIвалккан вуза. Рубасдиан Дербентдиз гъягъюри, Багьаудин Абасовдин регьберваликкди тренировкйир гъахури гъахьунза. Гьамус Мягьячгъалайиъ «Академия ММА» клубдиз гъягъюраза. Пишекарвалин кчIихбариъ иштирак шули, 2-3 йис вуйиз. Пишекарвалин кчIихбариз гъягъруган, увуз, маважибси, гьарган пул тувра. Хъа кчIихбариин юкIв алидарихъдира кми-кмиди талитариз удучIвурача. Сабпи ражари Москвайиъ талитариъ гъалиб гъахьунза, цци мартдин 10-пи йигъан гъахьи кчIихбариъра узухъди талитназ удучIвнайи бай ккагъунза, гьамус апрелин аьхириъра кчIихбариз гьязур шулаза».

Имран Исрафилов: «Узу Табасаран райондин Гъуярик гъул’ан вуза. Абйир-бабар Дагъ.Огни шагьриъ яшамиш шула, хъа узу Мягьячгъалайиъ, спортдиин машгъул духьну, «Горец» клубдиъ тренировкйир гъахураза. КчIихбариин юкIв али аьдати спортсменарихъдиси, пишекар спортсменарихъдира вуйи кчIихбариъ Урустадиъ кьюб ражари гъалиб гъахьунза, ММА-йиан ва самбойиан спортдин мастер вуза. Жигьил спортсменди сифте кIул’ан учв улупну, чаз ад гъазанмиш дапIну ккунду. Талитариз гъягъруган, спортсменариз яшамиш хьуз йи- швра, ипIрубра тямин апIуру. Ужудар гъалибвалар айи спортсмен Урусатдин сборный командайин дахилназра гъадагъуру. Эгер жигьили чан улихь метлеб дивиш, дугъхьан кьюд-шубуд йисандин арайиъ машгьур спорстмен хьуз шулу».

Спортсмен баяри, талитариз улихь ккимиди, чпиз къаршуди удучIвру спортсмендин кчIихбариз лигури, дугъан дирбаш ва кагьал терефар аьгъю апIури, кчIихбан техника артмиш апIури шлуваликан, спортдиъ хъуркьувалар улупурайи баяриз пулин читинвал адруваликан, хъа артухъси мумкинвал айиш, харижи уьлкйиризра талитариз гъягъюз гьязур вуйиваликан ктибтнийи. Дурари тазади спортдиз гъюру жигьиларикан олимпиадайин спортдин жюрйир ктабгъувал ккун гъапIнийи.

Ихь жигьил спортсменариз хъана аьхю талитариъ хъуркьувалар гъадагъувал, чпин юкIвариъ айи мурад-метлебар тамам хьувал ккун апIурахьа.