Къайд дапIну ккундуки, акцияйиъ Урусатдин 76 регион иштирак гъахьну. Мягьячгъала шагьриъ кIули гъубшу акцияйиъ шагьрин хайлин мектебари иштирак’вал гъапIну. Уч гъапIу кагъзар, кIажар кьюбпи ражари вуди тартиб дапIну, дурарикан фукIа жара мутму гьясил апIбан бадали, Краснодариз хътаъну.

Экологияйин акцияйиъ дестйириинди иштирак хьпан натижйириз лигну, Мягьячгъалайин 14-пи нумрайин мектебди 2 тонна 380 кило макулатура уч гъапIну ва 1-пи йишв гъадабгъну, хъа акцияйиъ кIул’инди вуди иштирак хьпан номинацияйиъ чан яш 6 йис дубхьнайи бицIи Тимур Аьбдуллаев, 263 кило кагъаз-кIаж уч дапIну, сабпи йишван сагьиб гъахьну.

Гьарсаб региондин натижйириз лигну, экологияйин акцияйиъ гъалиб гъахьи иштиракчйириз апрелин 10-пи йигъаз Москва шагьриз пешкешар тувбан мяракайиз дих гъапIну. Дагъустандиан дина гъушдарин арайиъ Мягьячгъалайин 14-пи нумрайин мектебдиан гьау ихь ватанагьли Физули Сефербегов ва Тимур Аьбдуллаев а.

Гъалибчйир кубокдиинди ва кьиматлу пешкешарихъди лишанлу гъапIну.

Акцияйин гьякьнаан чан фикир ачмиш апIури, Физули Сефербеговди гьамци гъапнийи: «Му жюрейин акцйир гъахували табиаьт ва яркврар уьрхюз, экологияйин культура артмиш апIуз кюмек тувди, инсанар зирзибил уч апIбахьнара вердиш хьузра гъитди».

Гьамусдихъан тина акция Урусатдин регионариъ йисан кьюб ражари кIули гъабхуз йикьрар адагъну.