Проект, 2018-пи йисан 1-пи ноябрилан ккебгъну, 2019-пи йисан 30-пи сентябризкьан Урусатдин Федерацияйин 6 региондиъ уьмриз кечирмиш апIуз хъюгъна. Дидин иштиракчйир бицIидарин хулариъ, интернат–мектебариъ, сагъламвал за апIру центрариъ айи 9 йислан 17 йис’ина яшар духьнайи бицIидар ву.

Фонднан командайи спортдин машкврар гъахру регионар мялум гъапIнийи: Ставрополин край, Волгограддин, Воронеждин, Саратовдин, Белгороддин областар, Дагъустан Республика.

Гьарсаб региондиъ кьюд йигъандин спортдин фестиваль гъябгъиди, фестивалиъ 150-тIан артухъ бицIидар иштирак духьну ккунду. Региондин ужударсдар 2 команда финалиъ Волгограддиъ 2019-пи йисан сентябриъ кIули гъябгъру «Гьарсар бицир гъалибчи хьуз лайикь ву» ччвур тувнайи спортдин машквриз гъягъиди. Шубуд йигъандин машкв-рин форумдиъ варитIан ужудар командйир спортдин жюребжюр жюрйириан кIули гъягъру талитариъ, образованиейин программйириъ иштирак хьиди. Думу программйир гъахрур фонднан президент Елена Исинбаева ву.

Апрелин 5-пи йигъан пучIу атлетикайиан олимпиадайин чемпион риш Елена Исинбаева чан проектдиинди спортдин машквар гъабхуз Дагъустандиз гъафнийи.

Хъа апрелин 6-пи йигъан Елена Исинбаевайин ччвурнахъ хъайи Дагъустандин волейболин центриъ «Гьарсар бицIир гъалибчи хьуз лайикь ву» спортдинна яратмишарин серенжем ачмиш гъапIнийи.

Серенжемдиъ рягьимлувалин фонднан президент Елена Исинбаева, республикайин сарпи вице-премьер Анатолий Карибов, Табасаран райондин глава Мягьямед Къурбанов, думуган Хив райондин главайин вазифйир кIулиз адагъурайирин заместителди лихурайи Ярмет Ярметов, РД-йин Халкьдин Собраниейин депутат Алавудин Мирзабалаев, Дагъустандин физический культурайин ва спортдин министрин заместителар Зайнал Салаудинов ва Гьяйдарбег Гьяйдарбегов, Мягьячгъала шагьрин администрацияйиъ спортдин, туризмдин ва жигьиларин ляхнариз лигру комитетдин председатель Марат Ибрагьимов ва гьацдар жарадар иштирак гъахьну.

Серенжемдин иштиракчйирихьна тебрикнан гаф хьади Анатолий Карибов илтIикIнийи. Дугъу спортдин машкврар гъахру регионарин дахилназ Дагъустанра гъадабгъбаз лигну, Елена Исинбаевайиз чухсагъул мялум гъапIнийи ва яшайишдин читин аьгьвалатнаъ ахьнайи бицIидариз му жюрейин машкврар гъахбан важиблуваликан гъапнийи.

Машгьур ватанагьли шурахьна тебрикнан гафар хьади Табасаран райондин глава Мягьямед Къурбанов ва думуган Хив райондин главайин вазифйир тамам апIурайирин заместителди лихурайи Ярмет Ярметов илтIикIнийи. Дурари Елена Исинбаевайиз муниципалитетариз хялиш хьувалин теклиф гъапIнийи ва табасаран дишагьлийирин хилариинди дурхнайи уткан халачйир багъиш гъапIнийи.

Чан терефнаан Елена Исинбаевайи серенжем тешкил апIуз кюмек гъапIдариз варидариз аьхю чухсагъул мялум гъапIнийи.