Хив райондин депутатарин Собраниейин сессияйиъ иштирак гъахьи 33 депутатдикан 27 касди чпин сесер Ярмет Ярметовдихъанди тувну.

Аьлава апIурза, му месэла депутатарин улихьна сессияйиз адабгъайиз, райондин главайин гъуллугъниина вуйи кандидатарин арайиъ тялукь конкурс кIули гъубхнийи. Сюгьбат гъабхбан жюрейиинди кIули гъубшу конкурсдин 2-пи пайназ Ярмет Ярметов, Юрий Наврузбегов, Азим Аьбдулагъаев, Эдуард Мустафаев ва Ажав Зугьрабов удучIвнийи.

Конкурсдин 2-пи пайнан натижйирин бинайиинди конкурсдин комиссияйин председатель Аьли Ибрагьимовди Хив райондин депутатарин Собраниейиз протокол хътапIну. Думу протоколиъ конкурсдиъ заан хъуркьувалар улупу Ярмет Ярметовдин ва Юрий Наврузбеговдин кандидатурйир улупнайи.

Хъасин му кандидатари райондин депутатарин сессияйин иштиракчйир Хив район артмиш апIбан гьякьнаан чпин хусуси программйирихъдира таниш гъапIну.
УдучIвну улхбарин аьхириъ райондин Собраниейин депутатари ачухъ вуди сесер тувбиинди райондин главади Ярмет Ярметов ктагъну.

Къайд апIурза, райондин регьбервал апIувал, гьелбетда, рягьят ляхин дар. Райондин главайин гъуллугъниина тяйин гъапIу Ярмет Аьлиметовичди агьалйирин метлебар тамам ва уьмриз кечирмиш апIрувалик умуд кивдихьа.

Гьюрматлу Ярмет Аьлиметович! «Табасарандин нурар» газатдин редакцияйин коллективди, уву «Хив район» МО-йин главади ктагъувалихъди тебрик апIури, увуз район артмиш ва уткан апIбан рякъюъ мюгькам сагъ’вал, райондин жямяаьтлугъдихъди сигъ аьлакьйир хьувал ккун апIура. Гъит, Хив район артмиш апIбаъ увуз ягъур ибшри!