Гъи думу центр райондиъ варитIан аьхюдарикан сабси гьисаб шула. Му музей-центр абццбак саки вари гъуландари чпин пай кивну. Ниягьат Гьяжикъурбановна багъри гъулан гьарсаб хулаз гъягъюри, музей абццуз экспонатар лазим вуйиваликан кIури гъахьну. Гъи мушваъ, гьалав-халачийилан, кюгьне ягълухъарилан, гъаб-гъажагъдилан, кюгьне милли палатдилан гъадабгъну, агъзуртIан артухъ экспонатар уч дапIна.

Ниягьат МутIалимова ич сюгьбатнаъ, чан багъри гъуландариканси, «ТIивак гъулан совет» гъулан поселениейин глава Ибрагьим Гьяжиевдиканра рази-валиинди улхурайи. Жюрбежюр серенжемариъ иштирак шлу вахтна, центр, музей ва клуб лазим вуйи мутмйирихъди тямин апIбаз думу аьхю кюмекчи ву.

«Ич гъулан поселениейин художествойин самодеятельностдин коллектив Дагъустандиъ гъягъру аьхю серенжемариъ кми-кмиди иштирак шулу, респуб-ликайин саки вари шагьрариъси, думу Астрахань, Москва, Георгиевск ва гьацдар жара шагьрариз концертдин программйир хьади гъубшну. Вари йишвариъ учу гьюрматлуди кьабул апIуйи»,

– ктибтура РД-йин культурайин лайикьлу гъуллугъчи Ниягьат МутIалимовайи.

Республикайин хайлин серенжемариъ заан дережайиъди иштирак хьпаз лигну, Ниягьат МутIалимова РД-йин культурайин Министерствойин ва Табасаран райондин администрацияйин терефнаан швнуб-саб Гьюрматнан грамотйириинди ва дипломариинди лишанлу дапIна.