Райондин культурайин Хулан директор Исмяил Исмяиловди кIурайиганси, му тешкилатдин ляхник фольклорин пишекар Ражаб Нуровди чан лайикьлу пай кивра. Фольклорин пишекарди Ражаб Нуров 2018-пи йисан апрелиан мина лихура. Хъа дидиз улихьна культурайин гъуллугъчийи ярхи ва яратмиш апIбан читин рякъ ккадапIну.

Ражаб Нуров 1962-пи йисан Табасаран райондин Акъа гъулаъ бабкан гъахьну. 1988-пи йисан Мягьячгъала шагьриъ культпросвет-училище ккудубкIну, дугъу халкьдин музыкайин алатарин оркестрин регьбервал апIрурин пише гъадабгъуру ва музыкайин жюрбежюр алатариин уйнамиш апIуз дубгъуру. Дюзди кIуруш, музыкайин саб жерге алатариин Ражаб Рамалдановичди гьеле мектебдиъ урхури имиди уйнамиш апIури шуйи. Хъа училищейиъ дугъу чан аьгъювалар яркьу ва дерин гъапIну. Училищейин кьяляхъ Ражаб Нуров багъри гъулаъ клубдиъ лихуру. Думу вахтна, гъулариз гъягъюри, яшлуйирихъди гюрюшмиш шули, Ражаб Нуровди кюгьне вахтарин мяълийир, мукьмар уч апIури, дурар гъийин деврин музыкайин алатарихъди албагури гъахьну. Дугъу тартиб гъапIу мяълийир машкв-рин серенжемариъ жигьилари аьхю аьшкьниинди урхури шуйи.

ЦIиб вахтналан Ражаб Нуровдиз райондин культурайин Хулаз ляхниз гъюбан теклиф гъапIнийи. Душваъ думу бицIидарихъди ва живанарихъди вуйи ляхнин тешкилатчиди, табасаран халкьдин театрин режиссерди гъилихну. 1998-пи йисан Ражаб Нуровди Краснодарин культурайин академияйин театрламиш дапIнайи серенжемарин ва машкврарин режиссерар-тешкилатчйир гьязур апIру факультет ккудубкIуру. Райондин культурайин Хулаъ дугъан иштирак’валиинди халкьдин яратмиш апIбарин, сумчрарин ва халкьдин жара аьдатарин пропаганда гъабхури, мектебариъ урхурайидарин арайиъ конкурсар ва музыкайин жара майднар тешкил апIури, райондин культурайин Хулан вакилар республикайин серенжемариъ иштирак шули гъахьну.

Чан зегьметнан биографияйиъ Ражаб Нуровди Дербентдиъ Гьюкуматдин табасаран драмайин театриъ лихури гъахьи йисар лап мяналудар, бегьерлудар вуди гьисаб апIура. Душваъ думу 2001-2012-пи йисари режиссерди, кIулин администраторди ва артистди гъилихну, 30-тIан артухъ спектаклариъ ролар уйнамиш гъапIну, гьадму гьисабнаан кIулин роларра. Театриъ лихурайи вахтна Ражаб Нуровдиз «РД-йин лайикьлу артист» гьюрматлу ччвур тувну. 2010-пи йислан мина думу Урусатдин театрин гъуллугъчйирин союздин член ву.

Кьисмат гьаци гъабхьнуки, 2013-пи йисан Ражаб Нуров Табасаран райондиз кьяляхъ хъадакну гъафну ва райондин культурайин Хулаъ культурайинна гизаф касари иштирак'вал апIру серенжемарин тешкилатчиди лихуз хъюгъну. Хъа ккудубшу йисан апрелиан мина фольклориан пишекарди лихура. Дугъу жюрбежюр серенжемариз сягьнйир дикIури шулу, гьацира чаз кюмек апIурайи оператор Иса Аьбдурягьмановдихъди, «Фокус» студияйин эйси ва оператор Назир Идрисовдихъди ва спонсор Мягьямед Гьясратялиевдихъди сатIиди халкьдин фольклориан швнуб-саб ролик гьязур гъапIну. Дурариз Ютубдиъ лигуз шулу.

Гележегдиз вуйи ляхнин планариъ Ражаб Нуровдиз асас фикир табасаран халкьдин тарихдиз, фольклориз, дурарикан вуйи аьгъювалар яркьуди тарагъбаз тувуз ккунди а. Думу гьар вахтна чан ляхнин вазифйирихьна дикъатлуди янашмиш шлур ву. Гьаци, дугъу хъана заан хъуркьувалар гъазанмиш апIрувалин шак адар.