Гьаму йигъари региондин Главайи образованиейин цирклин, вузарин ва сузарин кIулиъ айидарихъди, образованйирин управленйирин регьбрарихъди тешкиллувалин комитетдин заседаниейиъ республикайиъ гъахру серенжемарин план тартиб гъапIну. Гьаци, гъябгъюрайи йисан республикайиъ, образованиейин дережа мюгькам апIбахъди аьлакьалу вуди, образованиейин саб жерге идарйир арццди, сессйир ва илимдинна практикайин конференцйир тешкил апIиди, конкурсар, форумар ва жара серенжемар кIули гъахиди. Дурар гъахбан асас метлеб – региондин образованиейин гъурулуш цIийи дережайиз хувал ву.

«2022-пи йис ухьу Дагъустандиъ образованиейин Йисси мялум апIурахьа. Гьаму йисан ухьу, му цирклиъ алахьурайи варитIан учIру месэлйир ашкар ва ахтармиш дапIну, дурар гьял апIру рякъяриин дилихну ккунду. Хъа 2023-пи, 2024-пи, 2025-пи ва дидхъантина вуйи йисар ухьу ккебгъу цIийи ляхнин динамика хьибди. Гьаддиз электричествойихъди, штухъди, газдихъди тялукь вуйи ва гьацдар жара гъагъи месэлйириз лугарайи вахтна, ухьу образованиейиин дийигънийхьа. Образованиейин месэлйир сабпи нубатнаъди гьял дапIну ккунидар ву. Образование адарш, фукIара адру мисал ву», – гъапну республикайин Главайи.

Сергей Меликовди гьацира чан удучIвну улхбаъ мектеб кку-дубкIурайидариз ва чпин аьгъювалар багъри региондин артмиш’вализ сарф апIуз гьязур вуйи жигьил пишекрариз республикайин терефнаан кюмек тувбаканра гъапнийи. Амма гъи Дагъустандиъ чарасуз вуди игьтияж айи ва гьуркIри адру пишйирикан фикир дапIну ккунду.

«Гъи ухьуз фужар лазим ву? Темирязевка лазим вуйин? Ав, чарасуз лазим ву. Гьацира уьлкейин улихь хьайи жара вузарра. Аьгъювалар гъадагъбан кьяляхъ республикайиз хъадакну гъюрувалин йикьрарин кагъзар ацIну, 5-10 выпускник уьлкейин кIулин вузариз гьаърухьа»

– къайд гъапIну Сергей Меликовди.

Улубкьу цIийи йис республикайиъ образованиейин Йисси мялум апIувализ асас тясир гъапIуб агьалйирин арайиъ гъубху социалогияйин суалар кайи гьерхувал гъабхьну.
Думу гьерхбарин натижйириз лигну, гъи образованиейин цирклиъ алахьурайи асас учIру месэлйир арайиз адагъну.

«Образованиейин Йисан гъахру серенжемарин пландин кюмекниинди образованиейин аьлава идарйир тIауз, пишекарваларин дережа мюгькам, педагогарин ва ученикарин образованиейихьна ният за апIуз, образованиейин гьяракатар психологияйинна педагогикайин цирклариан сатIиди гъахуз, образованиейин тешкилатариъ ва идар-йириъ инфраструктура къайдайиз хуз, гьадму гьисабнаан бицIидари сагъ’вал мюгькам апIру ва рягьятвал гъадабгъру йишвариъра, аьлава образование артмиш, зигьимлу бицIидар ашкар апIбаз ва дурариз гележегдиъ кюмек тувбаз аьхю кьувват ва кюмек хьибди. Пландиъ гьацира образованиейин идарйириъ материалинна техникайин бина цIийи алапIувал, тербияйин ва аьгъювалар тувбан цирклиъ мялимариз илимдинна методикайин кюмек тувувал, мялимарин пишекарвалин дережа за апIувал, бажаранлу жигьилариз кюмек апIувал улупна», – гъапнийи чан нубатнаъ вахтназ вуди РД-йин образованиейин ва илимдин министрин вазифйир тамам апIурайи Ягья Бучаевди.

Заседаниейин аьхириъ Сергей Меликовди тешкиллувалин комитетдин бинайиинди лихру профильный аьлава дестйир арайиз духну ккуниваликан гъапну. Думу дестйири гьарсаб цирклиан кьатI’иди ляхин гъабхиди.

Заседаниейиъ республикайин Гла-вайи сабсана мялуматдикан къайд гъапIну. 2022-пи йисан январилан башламиш дапIну, студентарин ччвурнахъ вуйи стипендйир агъзур манатдилан 3 агъзур манатдиина, хъа аспирантарин – 1,500-дилан 5 агъзур манатдиина за гъахьну. Дагъустандиан вуйи, Москва ва Санкт-Петербург шагьрариъ урхурайи студентари цIийи йисан кьюд агъзурилан хьуд агъзур манатдиина артухъди стипендия гъадабгъиди.