Версия для печати

Валиева, «Уьру машин» ва жарадар…

Автор Зубайдат Шябанова Понедельник, 21 февраля 2022, 11:42 203
Валиева, «Уьру машин» ва жарадар…
||| ||| |||

 

 

Гьюрматлу дустар, учу гъапиганси, газатдин гьарсаб нумрайиъ жикъиди гьамусяаьт Пекиндиъ кIули гъябгъюрайи кьюрдун Олимпиадайин талитарикан мялуматар чап апIурача. Гьяйифки, гьар йигъан шулайи талитарикан хъайи-хъайиганси ктибтуз мумкинвал адар, хъа, гьаци вушра, Олимпиадайин аьхиримжи сад йигъ гъадабгъну, думу йигъан ва думу йигъаз улихьна гъахьи хъуркьуваларикан гъийин нумрайиъ мялуматар туврача.

 

 

Олимпиадайин талитар ккергъну 11-пи йигъан Урусатдин сборный командайи чпин копилкайиз кьюб медаль гъахну. Конькйириинди меркклиин жаргъру спортсменари дестейиъди жаргъбаъ кьюбпи йишв, хъа биатлонистари шубубпи йишв гъазанмиш гъапIну.
Му йигъан ихь спортсменарихьан гъизилин медаль гъадабгъуз гъабхьундаршра, думу саб терефнаан хъуркьувалинубси гьисаб апIуз шулу. Конькйириин сар-сарин кьяляхъди вуйи дестейин гьюжатнан талитариъ ихь командайи полуфиналиъ олимпийский рекорд дивну. Мидланра гъайри, Олимпиадайин тарихнаъ спортдин гьаму жюрейин талитариъ Урусатдин команда затра гъалибвалин йишварин сагьиб гъабхьиб дайи. Гьяйифки, финалиъ ихь баярихьан Норвегияйин спортсменар ккагъуз гъабхьундар, гьаци вушра, Даниил Алдошкин, Руслан Захаров ва Сергей Трофимов заан йишваз лайикьлу ву. Му жюрейин талитариъ шубарихьанра шубубпи йишв гъадабгъуз шуйи. Амма талитарин аьхириъ Голландияйин спортсменарин кьувват гужлиб гъабхьну.

Биатлонистари гъадабгъу кемшрин медалиин ихь гьевескрар сарра разиди адайи. Фицики, талитар ккергъубси ихь спортсменари чпин заан гьязурлугвал улупну. Гьевескрариз дурар пьедесталин садпи йишв’ин рякъюри гъахьну. Дугъриданра, Карим Халилийи, Александр Логиновди ва Максим Цветковди чпин этапар хъуркьувалиинди ккагъну ва, икибаштIан, ихь тамашичйир гъалибвалин сабпи йишваз ккилигурайи. Дурарин кьяляхъ талитнаъ Эдуард Латыпов учIвруган, ихь баяри командайиз жарадаринтIан саб дакьикьайин артухъ вахт гъабхнийи. Амма Латыповдихьан биатлондиъ хьуб ражари лишник кубкIуз гъабхьундар. Гьаддиз дугъаз лыжйириинди жаргъру рякъ ярхи гъапIну. Латыповди журумди улупу рякъюн манзил ккапIайиз Норвегияйин ва Францияйин спортсменар дугъан улихь гьудучIвну.

Му йигъан фигурный катаниейиан шубарин талитарра кергъну. Ухьу варидари ихь спортсмен риш Камила Валиевайихъанди юкIв убгурайхьа. Думу, 15 йисаъ айи живан риш, олимпиадайин пис политикайин бацаригъ гъяхъну. Дупну ккундуки, аьхиримжи йигъари вари дюн'яйин махлукьатлу хабрарин дакьатариъ Олимпиадайикан туврайи мялуматариъ Камила Валиевайин ифдин допинг-пробайик къанундиъ къадагъа дапIнайи триметазидин препарат гъибихъуваликан ва ихь риш талитариъ иштирак даршлуваликан кIурайи сабпи йишв дибиснайи. Амма Спортдин Арбитраждин судди ихь спортсмен шураз талитариъ иштирак хьуз разивал тувну, ва сабпи йигъан чан жикъи программайиъ думу сабпи йишваз лайикьлу гъахьну.

Камила миркклиина удучIвган, вари залиъ деънайи тамашичйири, гьевескрари ва жара командйирин спортсменари, деънайи йишварилан за духьну, думу гарччлариинди къаршуламиш апIури гъахьну. Камила Валиевайик тахсир ктрувалин вари гъавриъ айи. Амма допинг-пробарин ахтармишар гъахру компанияйин кIулиъ айидар ихь спортсменарин хъуркьуваларихьинди гьаз-вуш аьксиди лигура.

Къайд апIуб лазим вуки, Камила Валиевайи ва ихь имбу вари спортсменари ифи допинг-пробарин ахтармишариз Олимпиадайиз гъяйизра, ва талитар гъахайиз улихьна Пекиндиъра тувна. Анализари дурарин ифи мар-цциди айивал тасдикь гъапIну. Хъа Валиевайин ифдик декабрин вазлин анализари триметазидин препарат кайиб фици улупну гъапиш, Камилайин абайи юкIв иццурайиган думу дарман ишлетмиш апIура. Духтрарин гафариинди, эгер дурари саб астакниан шид гъубхъиш, ифдик думу дармнин проба улупуру. Му дюшюшдин гьякьнаан ахтармишар гьеле ккудукIнадар.

Талитариъ чан жикъи программайин кьяляхъ Камилайин уларилан нивгъар гъушнийи. Дугъу тренерари, гьевескрари ва тамашичйири чахъан юкIв убгурайивал, чахъ хъугърайивал гьисс апIурайи. Амма ихь шураъ гьамкьан йигъари ижми дапIнайи юкIв ва нивгъар дерккуз аман имдайи.

Му йигъан жикъи программайиъ кьюбпи йишвра ихь фигуристкайи – вари дюн'яйин чемпионка Анна Щербаковайи гъадабгъну. Хъа ихь сборный командайиъ айи Александра Трусова юкьубпи йишван сагьиб гъахьну. Му талитариан чемпионар ва пешкешнан йишварин сагьибар февралин 17-пи йигъан произвольный программайин кьяляхъ мялум хьиди.

Четвертьфиналиъ ихь хоккеистар Данияйин командайихъди талитназ удучIвну. Натижайиъ Урусатдин команда 3:1 гьисаб ади гъалиб гъабхьнийи. Хоккейдиан полуфинализ Урусатдин, Словакияйин, Финляндияйин ва Швецияйин сборный командйир удучIвну. Хоккейдиан Урусатдинна Швецияйин ва Финляндияйинна Словакияйин командйирин арайиъ вуйи талитар февралин 18-пи йигъан кIули гъягъиди.

КIваин апIуз ккундучузки, хоккейдиан Урусатдин сборный команда команда («Уьру машина») улихь ккимиди вуйи прогнозариинди гъалиб хьуз варитIан гизаф мумкинвал айи командаси гьисаб апIура, хъа дидихъди гъизилин медаль бадали асас бягьснаъ убчIвуз мумкин вуйиб Финляндияйин команда ву.

Гъазанмиш гъапIу медаларин кьадар улупру таблицайиз асас вуди, сабпи йишв’ин Норвегия (14 – гъизилин, 7 – арсран, 8 – кемшрин медалар), кьюбпи йишв’ин Германия (10 – гъизилин, 7 – арсран, 5 – кемшрин), шубубпи йишв’ин США (8 – гъизилин, 8 – арсран, 5 – кемшрин) ал. Урусатди таблицайиъ 9-пи йишв дибисна (5 – гъизилин, 9 – арсран ва 12 - кемшрин).

Олимпиадайин талитар февралин 20-пи йигъазкьан давам хьиди.

Оцените материал
(0 голосов)

Похожие материалы (по тегу)