Гьаму йигъари вахтназ вуди РД-йин Правительствойин председателин заместителин вазифйир тамам апIурайи Рамазан Жяфаровдин регьберваликкди, ВКС-дин къайдайиинди яркьу совешаниера кIули гъубшну. Думу Донецкий ва Луганский халкьдин республикйириъ эвакуация апIбак ккахъу агьалйир Дагъустандин аьтрафариин кьабул апIбан месэлйириз бахш дапIнайи.

Р.Жяфаровди къайд гъапIганси, Донецкий ва Луганский республикйириъ гъагъи аьгьвалат арайиз дуфнайивалихъди аьлакьалу вуди, ихь гьюкуматдин сяргьятариин ва Ростовский областдиъ, чпин багъри юрд дипну, гьергну гъюрайидарин кьадар артухъ шула. Ростовский областдиъ, вахтназ вуди РФ-дин МЧС-дин министрин вазифйир тамам апIурайи Александр Чуприянов кIулиъ ади, Урусатдин МЧС-дин гьяракатнан федеральный десте арайиз дубхна. Урусатдин регионариз эвакуацияйикк ккахънайи агьалйир кьабул апIуб табшурмиш дапIна.

«Дагъустан Республикайин Правительствойи Урусатдин МЧС-диз региондин аьтрафариин 600 кас кьабул апIуз гьязур вуйивалин гьякьнаан кагъаз хътапIну. Аьхиримжи йигъари республикайин МЧС-ди гьюкмин органарин вакиларихъди сатIиди му месэлайин гьякьнаан гьязурлугвалин ляхнар ва серенжемар кIули гъухну.

Къайд апIуз ккундузузки, думу инсанар, уьмрин гъагъи аьгьвалатнаъ ахъну, чпин хал-йишв гатIабхьну гьергуз мажбур гъахьи касар ву. Ухьу дурариз дагъустандин хяларихьна гьюрматлувалиинди янашмиш хьпан вари аьдатар улупну ккунду», - гъапнийи Рамазан Жяфаровди.

Республикайиъ кьабул апIурайи агьалйир Къарабудагъкент райондин «Солнечный берег», Гъяйтагъ райондин «Огонек» бицIидарин сагъламвал уьбхбан лагерариъ, гьацира Избербаш шагьриъ ерлешмиш дубхьнайи туристарин «Прибой» ва Мягьячгъалайиъ айи «Дельфин» базйириъ яшамиш хьиди.

Сабпи кюмек

«Саб вуйи Урусат» партияйин региондин отделениейин секретарь Сергей Меликовдин табшуругъниинди, Донецкий ва Луганский республикйириан Урусатдин аьтрафариина гьергну гъюрайи инсанариз Дагъустандин терефнаан сабпи кюмек вуди, 10 тонна убхъру шид хътапIну.

Дагъустандин Муфтиятдиан мялум гъапIганси, рягьимлувалин кюмек тувру «Инсан» фондну Донецкий ва Луганский халкьдин республикйириан Ростовдиз гьергну дуфнайи касариз шубуб фурайиъди кюмек хътапIну. «Му 30 тонна итIру тадарукар, 25 тонна убхъру шид, аьхюдарин ва бицIидарин фаслин палатдин ва ликариин алахьрударин 3 агъзуртIан артухъ комплектар ву», - гъапну региондин Муфтиятдин председатель Мюгьяммад Майрановди.

Мягьячгъалайи 200 кас кьабул апIуру

Мягьячгъала шагьрин мэр Салман Дадаевди республикайин меркезра –Донецкий ва Луганский халкьдин республикйириан гьергуз мажбур гъахьи инсанар кьабул апIуз гьязурди айиваликан гъапну.

«Узу идара апIурайи «Саб вуйи Урусат» партияйин Мягьячгъала шагьрин отделениейи Мягьячгъала шагьрин гъирагъдиъ ерлешмиш дубхьнайи пансионатдиз дявдихьан гьергну гъюрайи 200 кас кьабул апIуз гьязур вуйивалин гьякьнаан къарар адабгъну. Думу инсанар вари яшамиш хьпан ужудар шартIарихъди, сабпи кюмекнахъди ва гьар йигъан шубуб чIив ипIрубдихъди тямин апIидича», - гъапну Салман Дадаевди.