Версия для печати

ЕГЭ-йин кьисмат фициб хьибди?

Автор Сефижат Кьасумова Понедельник, 28 февраля 2022, 10:07 229
ЕГЭ-йин кьисмат фициб хьибди?
||| ||| |||

 

 

Мялум вуйиси, ЕГЭ-йин гъурулуш уьмриъ гьяятназ кечирмиш апIуз хъюгъхъантина, гъира, дидин ужудар ва харжи терефар ачухъ апIури, агьалйирин арайиъ улхбар яваш духьнадар. Йислан-йисаз дидин тереф уьбхюрайидарин кьадар цIиб шула. Аьдати агьалйирси, гьюкмин вакиларра, депутатарра ЕГЭ ккутIну ккуниваликан улхура.

 

Улихьнаси Госдумайин образованиейин ва илимдин комитетдин председателин заместитель Максим Зайцевди мялум гъапIганси, Урусатдиъ ЕГЭ ккутIуб мумкин ву. Дугъан гафариинди, мектебариъ урхурайи баяр-шубариси, вузарира дициб къарариз разивал улупура.

«Цци кIурадарза, ваъ. Хъа гележегдиъ думу ккутIрубдин шак гъубзрадар, фицики ЕГЭ-йихьан чан метлебнахъ хъубкьуз гъабхьундар. Думу гъурулуш тIапIрира хайлин вахт гъабхьнийи – 15 йискьан, гьаддиз дидхьан ярхла хьпан бадалира вахт гъябгъиди», – гъапну депутатди.

США-йиъ, Европайиъ, хъасин Урусатдиъра ЕГЭ тIапIбан тажруба ва натижйир ахтармиш апIури гъахьи Урусатдин табии илмарин Академияйин член-корреспондент Сергей Комковдин гафариинди, дугъу сифтетIан Гьюкуматдин саб вуйи экзамендиз чан къаршувал улупури гъахьну. «ЕГЭ тIапIувал неинки аьхю гъалатI, хъа гьацира урусатдин образованиейиз ва вари гьюкуматдиз милли бедбахтвал гъабхьну, фицики диди тамам вуйи кьялан образованиейин гъурулуш чIур апIиди. Гъи гьаци гъабхьнура ву», – къайд гъапIну аьлимди.

Экспертарин фикриинди, ЕГЭ баяр-шубарин аьгъювалариз кьимат туврайи метлебсуз гъурулуш ву. Диди, гьякьлу жавабар кIваълан апIуз ва бланкар ацIуз дубгъуз гъитри, бицIидарин вахт тадабгъура. Мидланра савайи, суалар тест жюрейиинди гьязур дапIнайивали, ужудар аьгъювалар айи бицIидариз дурар яркьуди ачухъ апIуз мумкинвал гъибтрадар. Бязиган, фицибкIа дюшюш себеб вуди, ужуди урхури гъахьи балин-шуран натижйир асккандар, хъа зяифди урхури гъахьирин – заандарра хьуб мумкин ву. Мицдар дюшюшари баяр-шубарин психикайизра зарар тувра.

Гьаддихъди сабси, цIибди вушра, хъа ЕГЭ-йин тереф уьбхюрайидарра а. Дурарин фикриинди, мициб жюрейиинди экзамен гъабхували коррупцияйиз рякъ хъябкьра. Мидланра савайи, жюрбежюр регионариъ уьмуми образованиейин ери чиб-чпихьди тевуз ва заан аьгъювалар айи баяр-шубариз, фунуб региондиан вушра, уьлкейин машгьур вузарик урхуз кучIвуз мукинвал шула.

ЕГЭ-йин гьякьнаан ичв фикир фициб вуйичв?

 

Оцените материал
(0 голосов)

Похожие материалы (по тегу)