Гъябгъюрайи йисан 22-пи апрелиъ жвуми гъудгнин кьяляхъ му выставкайин аку хяднан нур Мягьярамкент райондин Ярагъ-Къазмаляр гъулаз кьисмат гъабхьнийи.

Му ражари выставкайиз къанна хьубдихьна алат хъадаънайи, ва гьарсаб алат жа-жара машиндиъди рякъ’ин дапIнайи.

Улихь-кIулихь Мягьярамкент райондин глава Фарид Аьгьмедов ва гъулариан вуйи имамар хьади, аьдати динагьлийири, хилариъ чру пайдгъар, шарар ва плакатар дидисну, гьяйвнариин али жигьилари машинарин цIар райондиз кьабул гъапIнийи.

Шубуд йигъандин арайиъ му выставкайиъ аьхю аьшкьниинди ва иштагьниинди ихь уьлкейин вари пIипIариан агъзрариинди касар иштирак гъахьнийи. Чпин улариинди Мягьямад Пайгъамбрин (с.аь.в) ва дугъан хизандин алатар рякъюрайивалиан ва, мидихъди сабси, му мистаъ Кьур’андиан вуйи марцци келимйир, нашидар ерхьурайивалиан кьадар адрубкьан юкIв шадвали абцIну, чпи гьисс апIурайибдиан, жвувазра мялум дарди, дурарин улариина нивгъар гъюрайи.

Выставкайиз гирами шей’ариз лигуз дуфнайидарин арайиъ Хив райондин глава Ярмет Ярметов, райондин имамарин председатель Шябан Салигьов, райондин имам Мансур Везиров ва хайлин жара агьалйир айи.

Ярмет Ярметовди выставкайиъ арайиз гъафи чан гьиссар ва фикрар гьамци ачухъ гъапIнийи: «Гъи аьзиз Рамазандин вазлиъ инсаниятдиз мициб ягъурлу рякъ ва улариз акв улупуз мюгьлет туву касариз, кIулиъ Дагъустан Республикайин муфтий, шейх Аьгьмад-гьяжи Аьбдуллаев ади, аферин ва чухсагъул кIураза. Мицдар серенжемариъ иштарак шулайидарин сан гьисаб адру кьадар гъябкъиган, халкьдин сабвал, чвевал, инсанвал, аьхюр-бицIир гюзет апIувал, хатур-гьюрмат уьбхювал заан дережайиан вуйиб субут апIурахьа. Гъит, мина гъафи касарин алдагъу ликар Кябайиз гъафи мисалнак ва женнетдиз кьисмат ишри! Ихь апIурайи гъудгнар, дисурайи ушвар ва адагъурайи садакьйир Аллагьу Тяаьлайи кьабул апIри. Мусурман чвйир-чйириз ктабхъурайи аьзиз Рамазандин ваз марцци кIваан тебрик апIури, жанди сагъ’вал, хизандиъ шадвал, суфрайихъ намуслу, гьялал ризкь ва дюн’яйиъ ислягьвал хьувал ккун апIураза».

Аьлава апIури, пуз ккундузуз, гьаму йигъари Мягьямад Пайгъамбрин (с.аь.в) ва дугъан хизандин алатарин выставка Леваши райондин Леваши гъулаъ кIули гъябгъюра.