Берлиндин аьтрафариин Советарин армияйи Вермахтдин ва СС-дин кьушмар дагъитмиш апIру швнуб-саб гьюжум гъурхну. Амма гъизгъин женгар гъахуз немцарин гьеле ужудар кьувватар имийи. Советарин командованиейин мялуматариинди, немцарин резервдиъ 200-дихьна дивизия айи.

Берлин бисбан операция 1945-пи йисан апрелин 16-пи йигълан майдин 2-пи йигъаз гъябгъюри гъахьну. «Берлин бисбан женгарихъан» медалиинди советарин миллионтIан артухъ эскрар лишанлу гъапIнийи. Берлиндин операция инсаниятдин тарихнаъ варитIан аьхю женгарси гьисаб дапIна ва Гиннессдин рекордарин китабдиз гъадабгъна. Кьюбиб терефарихъанра думу женгариъ шубуб миллионна гьацIтIан артухъ инсанар, 8 агъзур танк ва 11 агъзур самолет иштирак гъахьнийи.

Берлиндин женгарин кьяляхъ немцарин дустгъариан швнуд-сад варж агъзрариинди инсанар азад гъапIну. Дурарин арайиъ Бельгия гьюкуматдин вари кьушмарин кIулиъ айидар, Францияйин премьер-министр Эдуар-Мари Эррио, Норвегияйин кьушмарин КIулин главнокомандующий Отто Руге ва хайлин жарадар айи.

Немцарихъди женгар гъахбахъди сабси, советарин эскрари Берлиндин агьалйир итIру сурсатарихъдира тямин апIури гъахьнийи. Му ляхин советарин сарпи военный комендант Николай Берзаринди чаина гъадабгъну.

1945-пи йисан апрелин 16-пи йигълан советарин эскрари немцарин 93 дивизия дагъитмиш гъапIну. Думуган Уьру Армияйин 180 частназ ла-йикьлу «Берлиндин кьушмар» ччвур тувнийи.

Рейхстаг бисбан гьюжмар апрелин 28-пи йигълан 2-пи майдиз гъягъюри гъахьну. Дид’ина швнуб-саб ражари гьюжум гъапIну, 89 яракьдиан цIа уьлюбхну гъабхьну. Амма немцариз думу тувуз затра ккунди адайи.

«Майдин 2-пи йигъан сяаьт 10-диъ сабпну вари яваш гъабхьи, цIа уьлюбхювал дебкку, яракьарин сес хътубтIу. Саб фу-вуш гъабхьивалин вари гъавриъ ахънийчу. БицIи вахтналан, гьелелиг гъадагъну адру Рейхстагдин канцелярия-йин, Паччагьлугъ операйин дараматарин улдариан ва подвалариан лизи чарчар ирчуз хъюгъну. Душвариан аьхю кьадар инсанар удучIву. Ич улихьди генералар, полковникарин десте, хъа дурарин кьяляхъди эскрар гъягъюрайи. Берлиндин асас майдандиина гъягъюри шубуб сяаьт гъабхьнийич», – кIваин апIура Рейхстаг бисбан ва Берлиндин женгарин иштиракчи Александр Бассарабди.

Берлиндин женгариъ Уьру Армияйин 78 агъзурихьна эскрар гъийихну ва 275 агъзуртIан артухъ касдиз зийнар гъахьну.