Гъи учву хилиъ дибиснайиб республикайин жямяаьтлугъдинна политикайин «Табасарандин нурар» газатдин 9 агъзурпи нумра ву. Цци сентябрин вазлиъ кIули гъабхуз планламиш дапIнайи газатдин 90 йисандин юбилейихъди сабси, му дюшюшра юбилейси гьисаб апIуз шулу.

Газатдин 9 агъзур нумра чапдиан адагъували «Табасарандин нурар» газат Дагъустандин милли газатарин арайиъ яшлударикан саб вуйиб тасдикь апIура. Газат чапдиан удубчIвурайи гьаму давамлу вахтна, диди гьар гьяфтайиъ чан машариъ ихь республикайиъ, улкейиъ ва вари дюн’яйиъ кIули гъягъюрайи важиблу гьидисйирикан маракьлу макьалйир чап апIури, табасаран халкь ихь жюрбежюр рангарин уьмрин гьякьикьи гьялнакан дугъри мялуматарихъди таниш хьуз гъитра.

Ккудушу вари йисари «Табасарандин нурар» газатди, ихь халкьдихъди сабси шадвалин йигъарра, пашманвалин йигъарра пай апIури, чан машариъ ихь миллетдин вакиларин хъуркьуваларикан ва яратмиш’валарикан, чIалнакан ва культурайикан, тарихнакан ва умударикан, мясляаьтнакан ва дустваликан, игитваликан ва жюрэтлуваликан макьалйир чап апIура. «Табасарандин нурар» газатдин тажрубалу коллективди му ляхин гележегдиъ хъанара гужал апIиди.

Къайд дапIнайи дюшюшдихъди ухьу вари тебрик апIури, гележегдиъ «Табасарандин нурар» газат урхру ватанагьлийирин, дидин улдукьу дустар шлу касарин, ширин сюгьбатчйирин кьадар хъана артухъ хьибди кIури, миж киврача.

«Табасарандин нурар»
газатдин коллектив