ПОСЛЕДНИЙ НОМЕР
Свежий выпуск
Аьбдулхаликь халуйина Гюльзаман халайи йицIисар бицIир аьхю ва тербияламиш, вари эвленмиш гъапIну – му игит абйир-бабарихьантIан удукьру ляхин дар. Гъи, мисалназ, ихь мектебариъ саб классдиъ йицIисар бицIир айиган, мялимар гьадму бицIидариз дарс кивбакан инжиклуди шулу. Хъа, йицIисар бицIир дюн’яйиина духну, дурар аьхю гъапIу Гюльзаман халайикан хабар гъадабгъухьа. Гъи думу дишагьлийин мухрик кайи «Игит-баб» ва «Бабвалин машгьурвал» I ва II дережайин орденари дугъу гъизигу игит зегьмет тасдикь апIура.
– Аьбдулхаликь халу ва Гюльзаман хала, мициб аьхю хизан тербияламиш гъапIу учвуз аьхю кьувват тувричвуз. Газат урхурайидариз ичв аьхю ва албагу хизандин асас усуларикан ктибтуб ккун апIураза.
– Учу, жилирна хпир, сатIиди яшамиш шули, 56 йис вуйич. Ва, му яш хъапIну, узу саб вахтнара йиз хизандикан чIуру гаф ва ляхин гъябкъю кас дарза. Абайин ва бабан арайиъ гьюрмат ади гъабхьиш, бицIидарра, дурариз лигури, дурарин рякъюди гъягъиди.
Ич баяр-шубар учу гъапибдилан улдучIврудар дайич. Дурар мектебдиан гъафиган, шли фу ляхин дапIну ккундуш, дурариз вахт тартиб апIбан таблица гьязур апIуйза, хъа имбу вахтна кьастлуди дарсариз лигуз гъитуйза. БицIидар гьаммишан баб ва ватан уьрхбан тербия туври вердиш дапIну ккунду, – гъапнийи Гюльзаман халайи ва сабгерендилан давам гъапIнийи: – Узуз хьур риш ва йирхьур бай айиз. Гъи дурарин варидарин хилиъ дипломар а. Зарема, Анжела, Сабина, Саида мялимар вуйиз, хъа Эсмирайи палтар дирхру курсар гъурхнийи. Баярикан кIуруш, Ислам Къизлар шагьриъ ГОВД-йин начальникдин заместителди лихура, полицияйин майор ву, Икрам С.-Петербург шагьриъ хулар дивру фирмайиъ лихура, Гьяким, хайлин йисари Къизлар шагьрин ГОВД-йиъ ляхин дапIну, гъи пенсионер ву, Мухтру Къизлар шагьрин Росгвардияйиъ гъуллугъ апIура, Вагиф Дербент шагьрин ГОВД-йиъ лихура, хъа Эдгар Краснодариъ военный ву. Вари баяри ихь Ватандин ислягьвал уьбхру пиш-йир ктагъну. Гъи вари бабар фици чпин баяриз ккилигураш, гьаци узура Украинайиъ кIули гъябгъюрайи хусуси метлеб айи дявдин операцияйиъ иштирак шулайи Мухтариз ва Эдгариз ккилигури дусназа.
– Гюльзаман хала, улихьдин деврихъди тевиган, гъийин девриз фициб кьимат тувуз шулу?
– Думу кюгьне вахтари гъи ухьуз рябкъюрайигансиб девир адайи. Кьюр, шубур гъардаш ва дурарин хизанар сад хулариъ яшамиш шуйи. Хизандин хулаъ суфра ккипу вахтна, хулан аьхюр деъну уьл ипIайизкьан, имбудар багахь шулдайи. Думу вахтари яшлу касариз аьхю гьюрмат айи. Швушву, нач’вал кади, сижар аба хьайи йишвахь бицIир хил’ина гъадагъурдайи.
ЙицIисар бицIирин жибкIрубра, алабхьрубра ва ипIрубра гьаму кьюд хилари гъапIдар ву. Палтар урччру вахтна, пичрак цIа кипну мани шид гьязур дапIну, булагъдиина гъягъюйча. Ва, фикир тув, гьар йигъан кьюб-шубуб бедре палтар урччру вахтар шуйич. Аьхюну баяр-шубари алабхьу-илдибту палат хъяляхъ хъайи бицIи чвйир-чйири алабхьуйи. Гьар гьяфтайиъ шубуб ражари уьлер уржури шуйча. Дюзди кIуруш, инсанарин яшайиш фукьан читинди вушра, дурар шадди шуйи.
Хъа гъийин девриъ инсанариз фу ккундуш апIуз, наана вушра гъягъюз вари мумкинвалар тувна. Дуланмиш хьуз аьгъю касдиз фукьан вушра ужудар вахтар ву. Булди ипIузра, алабхьузра а.
– Йиз фикриан, йицIисар бицIир хъайи дадайихъ худларра, гудларра духьну ккунду. Швнур худул ва гудул ачвуз?
– Худлар 21, хъа гудлар 6 айиз. Йиз веледар узукьан кIубнидар гъахьундар. Жигьилари сар-кьюр бицIиртIан апIури имдар. Дурар уьрхюз читинди ву, кIур. Гьамусдин жигьилариз фукьан вушра рягьятди ву, гьюкуматди бицIидар апIузра, уьрхюзра пулар тувра.
Му хизандин кIул Аьбдухаликь халу 43 йисан шоферди гъилиху кас ву. Хъа дугъан аба Аьбдулялиев Мурсал Аьгьядович Ватандин Аьхю дявдин иштарикчира ву. Думу, 1943-пи йисан Чехословакияйиъ кIули гъушу женгариъ зийнар гъахьир, гъулаз кьяляхъ гьаъру. Хъа гъи Аьбдулхаликь халуйин вари баярра Мурсал абайин шилнаъди гъушну. Гъи дурарин хизан дирбаш баяр тербияламиш гъапIу нумуналу хизанси гьисаб апIура – му кюлфетдиан хьур бали ихь Ватандин ислягьвал уьбхюра. Гъит Аьбдулхаликь халуйин ва Гюльзаман халайин Украинайиъ хусуси метлеб айи дявдин операцияйиъ иштирак шулайи баяр, дурарихъди ихь имбу жигьиларра, гъалибвал хьади ва сагъ-саламатди хулаз хъяляхъ хъадакну гъюри.