8 йислан 17 йис’ина яшар айи бицIидариз пособйир тувуз саспиган гьаз отказ апIураш аьгъю апIбан бадали, учу Дагъустандин Пенсйирин фондназ илтIикIунча.
Пособйир дуфну ккуни, яна 8-17 йисан яшар духьнайи веледар айи хизанарихьан гьамусяаьт, гъябгъюрайи йисан 1-пи октябризкьан Госуслугйирин порталианси, чпи яшамиш шулайи йишван МФЦ-йиан ва Пенсйирин фонднан отделиан аьрза тувуз шулу. Аьрза тувбан бадали варитIан асас шартIси улупнайиб, хизандиъ сар касдиз алабхъурайи гъазанждин кьадар (МРОТ) чпи яшамиш шулайи региондиъ улупнайибтIан цIиб вуди ккунду. Дагъустандиъ думу кьадар 11515 манат ву. Тувру пособиейин кьадар хизандиз гъюрайи гъазанждиканра асиллу ву. Яна, гъазанждиз дилигну, 50%, 75% ва 100% тувра.

Къайд апIуб лазим вуки, аьрза тувбан кьяляхъ, пособиейин кьадар тяйин апIру вахтна хизандиз гъюрайи вари гъазанжар гьисаб апIура, гьадму гьисабнаан 18-23 йис’ина яшар духьнайи веледаринра, эгер дурар студентар, вая эвленмиш духьнайидар дарш.

Аьрза тувбан кьяляхъ пособйир тувуз отказ апIбан себебарикан улухуруш, республикайин Пенсйирин фонднаан хабар тувиганси, дурар гьамдцар ву: хизандин вакилариз гъюрайи гъазанж зиихъ къайд дапIнайибтIан артухъ вуйивал, хизандин ляхин апIуз удукьру вакиларикан сарин гъазанждикан мялумат адрувал, хизандин хусусиятнакан мялуматар адрувал, гьацира ватандаш’вал тасдикь дапIну адрувал. Эгер пособие тувбан гьякьнаан аьрза кьабул дапIнадарш, Пенсйирин фонднан муштарйирин игьтияжариз лигру гъуллугъназ илтIикIай вая РД-йин ОПФР-дин ГУ-йин телефондин «убцру линияйиз» зенг апIинай (тел. 8 (800)-600-03-17).

Къайд дапIну ккундуки, аьрза 1-пи октябрь улубкьайиз фуну вазлиъ тувишра, бицIирин 1-пи апрелиз 8 йис дубхьнаш, пособие 1-пи апрелихъан мина тувра.