«Туристарин ва федеральный тур-операторарин терефнаан ихь респуб-ликайихьна вуйи маракьлувал рябкъюрахьуз. Инсанар гъахбан чартерный программайи ихь республикайиъ туристари гъадабгъру рягьятвал багьади дарди албагуз мумкинвал тувди. ЙитIнайи йикьрари ихь республикайиз хъана артухъ туристарин дестйир жалб апIуз мумкинвал тувди, Дагъустандин ва дагълуйирин яшайишдинна экономикайин аьгьвалат къайдайиз хуз, ихь уьлкейин ватандашариз гъулай шартIар арайиз хуз кюмек апIиди», –гъапну Сергей Меликовди.

Ростуризмдин кIулиъ айи Зарина Догузовайи къайд гъапIганси, Дагъустан туристарин арайиъ лап машгьур дубхьна, думу тереф федеральный мяна айи йишв дубхьна. «Мушваъ ихь улихь дийибгънайи месэла - инсанар аьхю хушниинди мина гъюруганси ва хъана мина гъюз юкIв шлуганси, уьлкейин ватандашариз хатIасуз, рягьят ва багьа дару шартIар яратмиш апIувал ву. Кьюбпи месэла – экономикайинуб ву. Гизаф регионариз туризм асас циркил ву, гьадму гьисабнаан Кавказдизра. Туризм артмиш апIури, агъзрариинди инсанариз лихру йишвар арайиз хуз, аьтрафариин яшайишдинна экономикайин артмиш’валин мумкинваларик гьяракат кипуз, агьалйириз мянфяаьт хуз шулу», – гъапну дугъу.

«Интуристдин» генеральный директор Виктор Тополкараевди къайд гъапIганси, туроператорин программайин дахилнаъди майдин вазлиъ гъуху чартерный рейсар 95% ацIри гъахьну. Дугъан гафариинди, Дагъустандиъ гъахьи туристар чпи гъадабгъу рягьятвалиин гьяйран духьна.
FAN&SUN компанияйин генеральный директор Тарас Демурайин гафариинди, гьелелиг Дагъустан Урусатдиз бегьемди ачмиш дубхьнадар, хъа рес-публикайиз айи мумкинвалар аьхюдар ву. «Урусатдин агьалйиризси, дуствалин жара уьлкйириан вуйи туристаризра Дагъустан маракьлу ву», – къайд гъапIну Тарас Демурайи.

FAN&SUN туроператорин Кафари Кавказдиз вуйи чартерный программа июндин 10-пи йигъан ккебгъра. Самолетарин рейсар Москвайиан Грозный шагьриз ачмиш апIиди, гьадлинтина туристар Чечендиъ, Дагъустандиъ, Кафари Осетияйиъ сейир апIуз гъягъиди. Самолетарин рейсар гьяфтайиъ кьюб ражари – талат ва жвуми йигъари – планламиш дапIна. Хъа 2-пи июлилан башламиш дапIну, сентябрин вазлизкьан Мягьячгъалайиз гьар гьяфтайиъ султ йигъан самолетдин рейсар хьиди. Туристариз вуйи турарин кьимат 30 агъзур манатдилан ккебгъра.