Гъийин йигъаз Дагъустандиъ Крымский геморрагический лихорадка уьзриан 9 кас аьзарлу ва сар кас кечмиш гъахьну. Думу дюшюшарикан 4 Гумбетовский райондиъ, 3 – Мягьячгъала шагьриъ ва са-саб – Дагъузпара ва Акъуша районариъ гьисабназ гъадагъна. Аьазарлу гъахьидариз хицIари кьацIар асас вуди мал-къарайиз лигурайиган ва табиаьтдиъ рягьятвал гъадабгъурайи вахтна гъивну.

ХицIарикан тарагъру боррелиоз, риккетсиоз ва жара инфекцйирин гъагъи уьзрар республикайиъ ашкар духьнадар.

Гъийин йигъаз Дагъустандин медицинайин идарйириз, хицIари кьацIар дивну, 344 кас илтIикIну, дурарикан 158 бицIир ву. Больницйириз республикайин саки 34 административ аьтрафариан ихь ватанагьлийир илтIикIна. Медицинайин кюмек ккун апIури илтIикIдар асас вуди Мягьячгъала, Хасавюрт, Каспийск, Дербент шагьрариан ва Хасавюртовский, Тарумовский районариан ву.

Дагъустандин муниципальный районарин ва шагьрарин администрацйири, СанПиН-дин тIалабариз асас вуди, гизаф инсанар уч шлу йишварихь - паркариъ, шагьрин кючйихъ хъайи бицIи багъариъ, накьваригъ, гъулариъ мал-къала хъапIру йишвариъ акарициддин дарман ебчура. Гъябгъюрайи йисан июндин 9-пи йигъаз 346,8 гайин йишваз (пландиъ улупнайи кьадарнакан 56%) дарман дивна.

Республикайиъ акарициддин дарман мал-къарайизра йивбан серенжемар кIули гъахура. Дагъустандин ветеринарный управлениейин улупбариинди, гъийин йигъаз пландиъ улупнайи кьадарнакан 58% малариз ва 30% марччариз дарман дивна.

Лазим вуйи серенжемар ва мониторингар гъахувал давам шула. Аьгьвалат Роспотребнадзорин РД-йиъ айи управлениейин гюзчиваликк кка.