Спортдин серенжем кIули гъабхбан бадали, Табасаран райондиз Урусатдиъ машгьур вуйи, кчIихру майдандиин улихь ккимиди мялумат тувру кас (ринг-анонсер), Урусатдин спортдин лайикьлу мастер, кикбоксингдиан дюн’яйин юкьуб ражарин чемпион, Европайин, Азияйин ва Урусатдин чемпион, гьамусяаьт «Ахмат» клубдиъ ляхин апIурайи Максим Вороновдиз дих дапIнайи.
«Табасаран 2022» турнир ачмиш апIури, Максим Вороновди Табасаран райондин кIулиъ айи Мягьямед Къурбановдиз гаф тувнийи.

«Табасаран жилариин учву кьабул апIуз учу гьарган рази вуча. Узуз турнирин тешкилатчйириз ва турнир гъабхуз кюмек гъапIу касариз, дустариз, гъарашугъариз – варидариз чухсагъул пуз ккундузуз. Гъит кIубанур гъалиб ишри!» – гъапнийи Мягьямед Къурбановди.

Турнириъ гъагъишнан жюрбежюр категорйирин айи спортсменарин арайиъ 10 кчIихбар гъахьнийи. Талитариз Дагъустандин районариан ва шагьрариан, Санкт-Петербургдиан, Самарайиан, Ростовдиан ва сар спортсмен Узбекистандиан дуфнайи.

Му йигъан Дербент шагьриан вуйи Вадим Абасов (70 кило гъагъишнан категорияйиъ); Мягьячгъалайиан вуйи Рамазан Ражабов (66 кило), дюн’яйин ва Урусатдин чемпион Шамиль Бахачалиев (61 кило), Дагъ. Огни шагьриан вуйи Нурутдин Амрахов (77 кило), Дербент шагьрин агьали Рамазан Чупанов (70 кило), Мягьячгъалайиан вуйи) Рамазан Амиров (77 кило) ва Исхак Аьлиев (70 кило); Дагъ Огни шагьриан вуйи Эмран Исрафилов (61 кило) кчIихбариъ гъалиб гъахьнийи.

Йиз фикриан, варитIан маракьлудар турнирин аьхириъ кIулиъ гъушу кьюб кчIихуб гъахьнийи. Ягъдигъ гъулан агьали, гьамус Ростовдиъ яшамиш шулайи Вазир Халибеговди ва Гъяякентдиан вуйи Эседулла Гюльмягьямедовди 84 кило гъагъишнан категорияйиъ чемпиондин чIул бадали гъати женг гъубхнийи. Гьеле сабпи раунддиъ Вазир Халибеговдин хилин гагь гъюбгънийи, амма дугъу шубуб раунд ккудукIайиз дидкан саризра хабар тувундайи. Иццрушнаан дугъхьан чаз хас вуйи къайдайиинди кчIихуз гъабхьундар, ва чемпионвалин чIулин эйси Гъяякент гъулан агьали Эседулла Гюльмягьямедов гъахьну.

Тамашичйир варитIан гизаф ккилигурайиб 70 кило гъагъишнан категорияйиъ AFC лигайин чемпиондин ччвур уьбхбан бадали кIули гъубшу кчIихуб вуйи. Дидиъ чиб чпиз аьксиди 29 йисаъ айи Узбекистандиан вуйи Бабур Аьбдулазизов ва 40 йисаъ айи табасаран спортсмен Багьаудин Абасов удучIвнийи. Бажаранлу табасаран спортсмен, ММА-йиан 12 ражари Дагъустандин, 9 ражари Урусатдин ва 6 ражари дюн’яйин чемпион, ушу-саньдайиан дюн’яйин ва армиейский хилариинди вуйи кчIихбариан Урусатдин чемпион Багьаудин Абасовди кьюб раунддиъ ММА-йиан Азияйин чемпион Бабур Аьбдулазизовдин зиин очкйириинди гъалиб гъахьнийи. Гьяйифки, шубубпи раунддин аьхириъ, Багьаудин, лик кучвубхну, алдакнийи ва гьадму вахтна дугъан кIулик кьюб ражари Бабури гъиву лик кубкьнийи. КIулин маар дутIурччвну, ачмиш даршули, Абасов гизаф вахтна дахъну имийи. Натижайиъ чемпион узбек спортсмен гъахьнийи.

Турнирин судйир Чечен Республикайиан вуйи. Талитарин кIулин судья Нурмягьямед Денильхановди турнирин гьязурлугвализ ужуб кьимат тувнийи, амма талитар тешкил апIбаъ, дугъан гафариинди, саб жерге гъалатIар деетнийи. Дурарикан варитIан асасуб – кчIихбариз удучIву спортсменар устадвалин дережа жигьатнаан барабардар даривал, заан пишекарвал айи спортсменарихъди тажруба адру таза спортсменар адаувал вуйи. Гьаддиз турнириъ иццру апIуваларра гизаф гъахьну, мидланра гъайри гизаф кчIихбар, саб раунд хьайизра, нокаутдиинди ясана бугъмиш апIбиинди ккудукIнийи.

Дугъриданра, ихь спортсменар, чпихъди кчIихбариз удучIвнайидариин вягьшйирси алархьуйи, гьаддиз судйири вахтниинди дицдар кчIихбар дерккну ккунду, спортсменариз гъагъи хатIйир дархьбан бадали.

Спортдин серенжемдин аьхириъ дидин тешкилатчйир вуйи Назим Абасовди ва Ислам Демирбеговди турнир гъабхуз кюмек гъапIдариз, гьацира райондин руководствойиз кIваантIан чухсагъул мялум гъапIнийи.

Турнириз кюмек гъапIу касар администрацияйин терефнаан Мягьямед Къурбановди чухсагъулин кагъзарихъди лишанлу гъапIнийи. Турнириъ чпи ужуди улупу спортсменариз спонсорари пулин пешкешар тувнийи. Гьаци, ихь ватанагьли, меценат Гьяжибег Аьлибеговди спортсмен Вадим Абасовдиз 50 000 манат, бизнесмен Эдей Рамазановди Вазир Халибеговдиз 50 000 манат, кьиматлу кагъзар масу тувбиин эллешмиш духьнайи Неби Небиевди Багьаудин Абасовдиз 3000 доллар айи конверт тувнийи. Спортсменар лишанлу апIбан серенжемдиъ «Абсолют» ООО-йин генеральный директор Аьбдулкерим Гьяжихалилов, Дербент райондин депутатарин Собраниейин депутат Аьли Гъарибов, гизаф мертебайин хулар тикмиш апIру «Мегаполис» компанияйин кIулиъ айи Аслан Гьяжиагъаев, Табасаран райондин ЦРБ-йин кIулин духтир Абсеретдин Мирзабегов, «Строй инвест групп» ООО-йин генеральный директор Артур Абасов ва ж. иштирак гъахьнийи

Дупну ккундуки, му йигъан зал инсанарихъди абцIну айи. Турнир лап маркьлуди кIули гъубшнийи. Табасаран райондиъ мициб турнир кьюбпи ражари гъябгъюра. Думу гьамусдихъантинара гьар йисан кIули гъабхбанди ву. Жигьил табасаран спортсменариз райондиъ му жюрейин талитар гъахували ужуб тажрубара тувра ва спортдин заан кIакIарихьна гъягъюз дурарик гьевесра капIра. Умудлу хьуз шулу, багарихьди Табасаран район машгьур апIру цIийи бажаранлу баяр хъана арайиз удучIвиди.