Улупнайи гъуларин глав-йирихъди, полицияйин участокарин вари ихтиярар айи вакиларихъди, гъуларин собраниейин депутатарихъди ва жямяаьтлугъ касарихъди гъубху сюгьбатнаъ хялари чпи гъюбан асас метлеб – 1-пи ноябрилан 31-пи декабризкьан тешкил дапIнайи чвлин призывдин 18 йислан 27 йис’ина яш дубхьнайи жигьиларин гьякьнаан мялуматар гъадагъу-вал вуйиб къайд гъапIнийи.

Чан удучIвну улхбаъ Мирзабег Багъичевди администрацияйикан ва военный гьисабнан столин гъуллугъчйирикан вахтниинди гьарсар призывникдихьна чан повестка хилиз рубкьувал, райондин больницайиан сагъламвал ахтармиш апIуз тяйин дапIнайи духтрарихьан илдицну, сиягьнаъ улупнайи призывникарин анализар гъадагъбан кьяляхъ, дурар призывдин комиссияйиз рякъ’ин апIувал ва закур, райондиъ гъуларин чвлин призывдин гьякьнаан натижйир йивруган, нач даршлусиб гьякь-гьисаб тувувал ккун гъапIнийи.

«1-пи ноябрилан 31-пи декабриина гъяйиз тешкил дапIнайи чвлин призывдин кампанияйин дахилнаъди Хив ва Агъул районариан 50-тIан артухъ жигьилар армияйиз рякъ’ин апIиди. Дурари чпин гъюнариин илипнайи буржи анжагъ сад йисан Урусатдин мулкариин тамам апIиди. Асас вуди къайд апIуз ккундузузки, хусуси метлеб айи дявдин операцияйиъ дурари иштирак’вал апIидар. Хъа жвуван аьшкьниинди контракт гъибикIиш, гьелбетда, думу жара месела ву. Гъит армияйиъ тамам йис дурарин жандиз мянфяаьт кади, хайирлуди ва ягъурлуди гъарабхри», – ккун гъапIнийи военный комиссар Пирмягьямяд Къубачевди.