Турнирин натижйириин асас духьну, варитIан ужудар спортсменарикан Табасаран райондин гужли команда тешкил апIиди. Дидланра савайи, турнир кIули гъабхбан сабсан метлеб – Табасаран райондиъ юкьяр дисбан спорт артмиш апIувал, живанар сагъу уьмур хъапIбахьна жалб апIувал вуйи.

Талитариъ Табасаран райондин 12 команда иштирак гъахьну. 2015-пи йисан, 2011-2014-пи йисари, 2008-2010-пи йисари, 2005-2007-пи йисари бабкан гъахьи живанари юкьяр дисбан спортдиан чпин бажаранвал улупнийи. Талитарин натижайиъ 1-пи йишв 4-пи нумрайин ДСЮШ-ди; 2-пи йишв – Ягъдигъарин командайи, 3-пи йишв – Дарвгъарин командайи гъидисну.

Дупну ккундуки, Табасаран райондиъ мицдар турнирар кми-кмиди тешкил апIуз хъюгъна. Жигьилари дурариъ аьхю аьшкьниинди иштирак’валра апIура. Жигьиларин спортдихьна маракьлувал артухъ апIбан бадали, райондин кIулиъ айидари гьамусяаьт спорт артмиш апIбан месэлйириз аьхю фикир тувра. Гьаддиз жигьил спортсменари спортдин жюрбежюр жюрйириан республикайин, Урусатдин ва дюн’яйин дережайин турнирариъ аьхю хъуркьувалар улупура.