Выставка «Самородки» проектдин дахилнаъди гъабхура ва думу респуб-ликайин культурайин уьмриъ аьхю мяна айи серенжемси гьисаб шула. Выставкайиъ республикайин 23 районарианна шагьрариан халкьдин художествойин сяняаьткарваларин 60-тIан артухъ устадари чпи ктау уьмаратар арайиз адагъну. Дурарин гьисабнаъ гъизилин ва арсран мутмйир, гъабар ва гъяйтагъдин кабчувалар, балхарин сахсийин шей’ар, халачичивал, мичIли яракь, дизигнайи шиклар ва хайлин жарадар айи.

Гьацира, душваъ, Расул Гьямзатовдин 100 йис хьпаз тялукь вуди, «Ихь Расул» кIуру 1930–1980-пи йисари гьязур гъапIу хилихьди дидикIнайи кагъзарин ва хилихьди каънайи суратарин, шикларин, поэзияйин, фотопортретарин выставкара ачмиш дапIнайи. Дурар Расул Гьямзатовдин хизандин вакиларин суратариан, дугъан хияларикан, фикрарикан, гъушу йшварикан, уьмриъ гъахьи гьядисйирикан, вари дюн’яйиъ айи адлу касарихъди гъахьи гюрюшарикан уч дапIнайи саб хайлин материалариан адагънайидар вуйи.

Серенжемдиъ «Ихь Расул» кIуру арт-проектдиинди, Дагъустандин М. А. Жемалин ччвурнахъ хъайи училищейин студентарра иштирак гъахьнийи. Дурари, мастер-класс улупурайи устадарин суратар зигури, хъасин дурар гьаруриз бахш гъапIнийи. Думу студентарихъди Мягьячгъала шагьрин бицIидарин художествойин мектебдиъ урхурайидарра иштирак гъахьнийи.
Табасаран райондиан му серенжемдиъ культурайин управлениейин гъуллугъчйир Барият Исмяилова, халачи убхуз улупури, Низакет Аьбдуселимова, атIнар ургъури, Зиявудин Гьяжиев, гакIвлин муччврар ктаури, иштирак гъахьнийи (шиклиъ). Уч духьнайидарин гевюл, Уружбег Аьлиевди (каманчи), Нариман Маллашагьбанов (далдабу), Дашбег Нурмягьямедовди (кларнет) – чпин мукьмариинди ачухъ гъапIнийи.

Хив райондиан му серенжемдиз атIнар ургъури, гьацира халачйирна гьалварра хьади, райондин культурайин управлениейин гъуллугъчйир Ферида Байрамова ва Альбина Аьбдурягьманова дуфнайи.

Му йигъан аьхюдар ва бицIидар маракьлувалиинди ва аьшкьниинди халачи убхбан, сахсийин алатар ктаъбан, гакIвлиан ва гъвандиан утIубчувалин, кабчувалин мастер-классариъ иштирак шулайи.

Магьа Тарумовский райондиан вуйи устад Любовь Назаровайихьна мастер-классдиз гъафи бициIидарин аьхю нубат арайиз дуфна. Дугъу дурариз «тIуб’ин алабхьру гъюр» уюнжагъ фици гьязур апIуруш улупура. Гьарсаб уюнжагъдин айитI дугъу бицIидариз меъли пешкеш иврайи.

Гъизилюрт райондиан вуйи Асгьябгьяжи Сягьидмягьямедовди выставкайиз гакIвликан кадаънайи накьишар хьади дуфнайи. Дугъан устадвализ хайлиндари заан кьимат тувну.
Къайд дапIну ккундуки, дишагьлийир, асас вуди халачийик гугар китIуз ккунди, Табасаран райондиан дуфнайи халачичйирин дуркьарихъна гъюрайи ва гъяйтагъдин накьишар карчбан гъайдайихъди таниш апIурайи устадарихьна илтIикIурайи. Хъа жилариз асас вуди Хасавюрт райондиан духнайи ругдин гварар кьабул духьнайи.
Выставкайиъ РД-йин Пра-вительствойин председатель Аьбдулмуслим Аьбдулмуслимов, РД-йиъ бицIидарин ихтиярар уьрбаан вари ихтиярар айи вакил Марина Ежова, республикайин министерствйирин ва идарйирин кIулиъ айидар иштирак гъахьну.

Аьбдулмуслим Аьбдулмуслимовди выставка ачмиш апIбан шадлугънан геренариъ къайд гъапIганси, гьаму йисан РФ-дин Президентдин къарариинди вари уьлкейиъ Дагъустандин халкьдин шаир Расул Гьямзатовдин юбилейдиз бахш дапIнайи серенжемар гъахиди.

– Ихь дагълу, кюгьне культурайин жюрбежюр аьдатарихъди девлетлу региондиз халкьдин сяняаьткарваларин жюрбежюрвал лапра хас ву. Ухьу, дугъриданра, гьарсаб арайиз хурайи шейънаъ чпин рюгьнан тики ибтрайи ихь дагъустандин устадарин хъуркьувалариинди дамагъ дапIну ккунду. Гьаму вахт думукьан гьииб дар. Гъи ухьуз гьарсариз ватанпересвал ва ватандиз вафалувал багьалу савкьатар духьну ккунду. Гьаму выставкайиъ кадетар, Урусатдин ЛНР ва ДНР регионариан вуйи бицIидар, Сирияйиан азад гъапIу бицIидар, студентар, жигьилар, гизаф веледар айи хизанариан баяр-шубар, культурайин ва искусствойин гъуллугъчйир, мектебариъ урхурайидар иштирак шулайивали шад дарапIди гъитудар. Ихь метлеб – культурайин ирс уьбхюб ва сар-сарихьна гьюрмат ади янашмиш хьуб вуйихь. Ислягьвал – варитIан аьхю девлет ву. Ва ихь аьдатари думу уьбхюз ва халкьарин арайиъ дуствалин аьлакьйир мюгькам апIуз кьувват тувра, –гъапну Аь. Аьбдулмуслимовди.

Шадлугънан серенжемдиъ выставкайиз дуфнайи вари устадариз РД-йин культурайин министерствойин дип-ломар тувну. Гьацира Дагъустандин адлу артистари ва коллективари Расул Гьямзатовдин яратмиш апIбариз бахш дапIнайи концертра улупнийи. «Дагъустандин булагъар» выставка 15-пи феврализкьан давам хьибди.