Газатдин гъубшу нумрайиъра учу студентариз бахш дапIнайи макьалйир чап гъапIнийча. Гъубшу аьсрин вахтна вузариъ урхури гъахьи, хъа гьамус жюрбежюр гъуллугъариъ лихурайи касари гьамусдин студентарин урхувал, сессия тувувал тянкьид апIури шулу. Вушра, жюрбежюр вузариъ хъуркьувалиинди дурхну, ужуб пишейин эйсйир духьнайи хайлин жигьил табасаранлуйир а.
Гъийин йиз макьалайин игит Аьлибег Гьяжибаев (шиклиъ) ву. Думу Мягьячгъала шагьриъ бабкан гъахьну. Аьлибеган абйир-бабар Табасаран райондин Пилигъ гъул’ан ву. Аьлибег компьютерихъди лап ужуди таниш вуйивализ лигну, гьеле мектебдиъ урхури имиди дугъаз программированиейиан жюрбежюр талитариъ иштирак хьувал теклиф апIури гъахьну. Мектеб заан хъуркьувалариинди ккудубкIну, чаз айи аьгъювалар хъана яркьу апIбан, мялуматарин хатIасузвал уьбхбан цирклиан заан образование гъадабгъбан бадали, Аьлибег ДГУ-йин информатикайин ва мялуматарин технологйирин факультетдик урхуз кучIвну, ва гьамусяаьт душваъ 1-пи курснаъ урхура. Думу циркил гъийин девриъ фукьан тIалаблуб вуш, ухьуз рябкъюрахьуз. Улихьнаси дугъахъди гъабхьи йиз сюгьбат исихъ туврача.

– Аьлибег, уву хъуркьувалиинди сессия тувбахъди, Студентарин йигъахъди тебрик апIураза. ДГУ-йиъ урхуз читинди вуйин? Уву кадабгънайи цирклиъ студентар фицдар серенжемариъ, талитариъ иштирак шула?

– Урхуз дици читинди дар. Хъа сессияйин вахтна хайлин жафа дизигну ккунду. Азад вахт айиган, жюрбежюр серенжемариъ иштирак шулача. Жюрбежюр урхбан талитариъ иштирак хьпан бадали, ужуб команда ади ккунду. ДГУ-йин дициб команда а, дидин дахилнаъ узура аза. Гьаму урхбан йис ккебгъиган, командайихъди сабси саб вазлин арайиъ Татарстан Республикайиъ кIули гъушу шубуб хакатондин (программистариз вуйи талитар) гъалибчйир гъахьунча.

– Думу жюрейин талитар ноябрин вазлиъ Мягьячгъалайиъра тешкил гъапIуваликан мялум вучуз. ЦIибди гьадрариканра ктибтнийиш, ккундийзуз.

– Ав, ноябрин вазлин аьхириъ Мягьячгъалайиъра «Цифровой хакатон» кIуру талитар кIули гъушнийи. Думу талитариъ 20 команда иштирак гъахьнийи. Командйирин улихь прог-раммированиейиан жюрбежюр месэл-йир дивнийи. Гьадрарикан саб – гъахьи дюшюшарин гьякьнаан шагьрин гъуллугъариз мялуматар тувувалин сервис арайиз хувал вуйи. Талитариъ республикайин гизаф вузариан студентар иштирак гъахьнийи, гьадму гьисабнаан ДГУ-йин, ДГТУ-йин, ДГУНХ-дин студентарра. Талитар 4 дережайиз пай гъапIнийи: презентацияйин ери, дизайн UX, тафавутлувал, техника жигьатнаан уьмриз кечирмиш апIувал. Учу гъахьи дюшюшарин гьякьнаан шагьрин гъуллугъариз мялуматар тувувалин сервис арайиз хпан кейс ктабгънийча ва, презентацияйин ерийиз лигну, 3-пи йишв гъадабгънийча. Къайд апIуз ккундузузки, 3-пи йишв пешкешнан йишв вушра, учу дид’ин рази гъахьундайча. Ич командайин фикриинди, учуз заан йишв рубкьуйи. Гьелбетда, команда талитнаъ айиган, улихь дивнайи месэла гьял апIбиин зегьмет зигуз аьшкь гъюру, гьевес кубчIвру. Гележегдиъ ич команда хъана ужуди талитариз гьязур хьпанди ву. Гъалибчйириз пулин пешкешарра тувнийи.

– Аьлибег, гележегдиз фицдар планар диврава?

– ВаритIан асасуб – закурин йигъак умуд кади хьувал ву. Вахт читинуб ву, Урусатдиин экономикайиин санкцйир илитIнайи вахтна, уьлкейизра, яшамиш шулайи аьдати агьалйиризра читинди алабхъуру. Университет ужуди ккудубкIну, йиз юкIв хъайи ляхин гъибихънийиш, гизаф шад шуйза.

– Яв кIваъ айи ужудар ниятар кIулиз удучIврияв, Аьлибег!