ВуйиштIан, Кюгьне Русьдиъ 30-пи январь кьюрдун суйлу машквар вуди ва думу йигъан Аязназ, кьюрдун шиклиъ учIвнайи Худайизси, икрам апIури гъахьну. Аяз абайин тарихди ччивар гьадму вахтариан гъадагъура. ЦIийи йисан машквар Аяз аба ва Йифун риш хъади къайд апIру аьдат швнуд-сад аьсрариинди гьюдюхну ва ихь йигъариз жара саягъ гъурубкьну. Дагълуйирихьна му машкврин аьдат Советарин гьюкумат арайиз гъюбхъан гъафну, ва дагълуйирра дидихьна жюрбежюр саягъниинди янашмиш шула. Амма, гьаци вушра, ихь арайиъ, дагълу ва мусурман аьдатар уьрхбахъди сабси, ЦIийи йисра яркьуди къайд апIрударин кьадарра цIиб дар. Гизафдари му машквар Аяз аба ва Йифун риш хъади къайд апIувал, баяр-шубариз шадвал хуз, дурар пешкешариинди рази апIуз вуйибси, гьисс апIура.

2021-пи йисан Дагъустандиъ Великий Устюгдиан Аяз абайин поездра кмиди кьабул гъапIну ва Мягьячгъалайиъ дагълуйирин Аяз абйир уч гъахьну. Ихь Аяз абйир, гьелбетда, миршар ккитIнайи мярхяриъди гъюрудар дар. Ихьдариз, аьба вая япунжи хъади, гьяйвниинди гъювал хас ву. Гьар фици вушра, гъит халкьар сатIи апIру ислягьвалин ва шадвалин машкврар артухъ ишри!