ПОСЛЕДНИЙ НОМЕР
Свежий выпуск
Му дишагьлийикан узуз Табасаран райондин дишагьлийирин союздин председатель Айханум Рашидовайи ктибтунзуз. Дугъан гафариинди, гьамусяаьт райондин гъулариъ айи яшлу дишагьлийири эскрариз атIнар урхура. Хайлиндар дурхну хъадаънура а. Эскрариз атIнар дурхну ккунивал фикриз гъафир ва дишагьилийир лазим вуйи кьадар мурсларихъди тямин гъапIур зиихъ къайд дапIнайи Сарият Мягьямедова ву.
Узу дугъахьна, чан баркаллу ляхникан ктибтуб ккун апIури, илтIикIунза. Гафар гъапIган узуз мялум гъабхьиганси, Сарият Мягьямедовайиз 4 велед а, гьадрарикан кьюри Ватандиз гъуллугъ апIура.
«Узуз шубур байна сар риш азуз. Аьхюнудар, эвленмиш духьну, гьарур чпин йишварихь хьа, хъа бицIину бали гьелелиг мектебдиъ 11-пи классдиъ урхури ами. Аьхюну баяр кьюридра Ватандиз гъуллугъ апIурайидар вуйиз. Санур Киров шагьриъ, хъа тмунур Сахалиндиъ лихура. Сахалиндиъ айи бай, Украинайин аьтрафариин кIули гъябгъюрайи хусуси метлеб айи дявдин операцияйиъ иштирак шулайиган, гюлле кубкIну, зийнарра гъахьир ву. Хайлин вахтна госпиталиъра гъахьну, хъа гьамус, сагъ хьпан кьяляхъ, чав контракт дибикIнайи эскервалин частнаъ гъуллугъ давам апIура», - ктибтнийи Сарият Мягьямедовайи.
Ич сюгьбатнаан мялум гъабхьигнаси, Сарият Мягьямедовайин юлдшин Мягьячгъалайиъ яшамиш шулайи дустру, инсанариз садакьаси пай апIинай кIури, улихьнаси мурслар хътаъну. Сарият Мягьямедовайи мурслар хайлиндариз пай гъапIну, хъа имбударикан ихь эскрариз атIнар урхбан мясляаьт адабгъну. «Аьхъю вахтна чIатинди удучIвиган, мичIал гъабхьидар дишлади хулаъ адаркуз гьялак шулухьа. Хъа Ватан бадали, йишв-йигъ дарпиди, аяз аьх апIури, чIат-чIурдин жилариъ дахъри - гъудужвурайи ихь эскрарикан фикир апIинай …
Ноябрин вазлиъ, багарихь хьайи гъулариъ айи дишагьлийирин арайиъ, эскрариз атIнар урхбан бадали, мурслар пай гъапIунза. Сакьюд йигъарин арайиъ уч гъахьи 80 жут атIнар дишлади отпускдиан кьяляхъ гъягъюрайи йиз язнайихьди эскрариз хътаунза. Гьамусяаьтра думу ляхин давам апIури амича. Гьар йигъан саки 10 атIнаркьан дурхну гьязур шула. Гъулариъси, Дагъустандин Огни шагьриъра урхурайидар а. Сабишв’инди гьисаб гъапIиш, гьамусяаьт саки 150 жуткьан атIнар уч духьна.
Ихь дишагьлийирин кюмек дайиш, узхьан сарихьан му ляхин кIулиз адабгъуз шулдайи. Гьаддиз гьаму ляхин кIулиз адабгъуз кюмек гъапIу вари дишагьлийириз чухсагъул мялум апIуз ккундузуз. Гъит варидарин баяр, гъардшар, адшар мани хулариз, чпин хизанарихьна сагъ-саламатди ва вахтниинди кьяляхъ гъюри», - аьлава гъапIнийи Сарият Мягьямедовайи. Хъа йиз терефнаан кIурзаки, Сарият Мягьямедовайихьанси, гьаму ляхин гьарурихьан апIуз шулу. Гъачай, вари сатIи духьну, ихь баяр аьхълушнахьан уьрхюрхьа!