Ав, дурар шлин гъардаш, шлин бай, шлин адаш, шлин жилир шулахьуз. Му аьгьвалат гьисабназ гъадабгъури, ихь сяргьятарилан гъи швнуб-саб тоннариинди кюмекнан гъагъ хъадапIнахьа ва думу баркаллу ляхин бизар дарди давамра апIурахьа. Му ляхнихьан Хив районра гъирагъдиъ гъубзнадар. Гьаму йигъари Асккан-Ярккарин гъул’ан Донецк Халкьдин Республикайин мулкниин хусуси метлеб айи дявдин операцияйиъ иштирак шулайи ихь баяриз медицинайин кюмек тувбаъ бакар шлу «Нива» машин масу гъадабгъну хътапIнийи.

Му хабар гъеебхьган, тамам мялуматар гъадагъбан бадали, узу улупнайи гъулан глава Сиражудин Сяидовдихьна илтIикIнийза.

«Учуз дина мициб машин чарасуз лазим вуйиваликан ич гъулажви Элмурза Сефихановди хабар тувнийи. Думу учвра, мобилизацияйин дахилнаъди гьадму цIин ялавнаъ иштирак шули, кьамкьлиз зиян дубхьну, Астрахань шагьрин госпиталиъ гъахьнийи. ЦIиб вахтналан гъулаз архаинвал гъадабгъуз гъафириин улукьнийза ва арайиъ гаф-чIал гъабхьнийич. Элмурза, узухьнаси, гьаму гъул’ан вуйи ва гьамусяаьт Новороссийск шагьриъ дилаварчиди лихурайи Вагиф Казимовдихьнара илтIикIнийи. Я миж кайир, я бурж кайир кIуруганси, валлагь, чухсагъул Вагифдизра. ГьачIабкку хилиз дишла бакар гъахьну. ГьудрубкIрайи пул, гъул’ан кючмиш духьну Мягьячгъалайиъ дуланмиш шулайи баяри, узура зенг гъапIиган, тувнийи ва гьамци, 330 агъзуриз машин гъабгунча. Машин йишв’ина гъурубкьубси командир Максим Дадашевди (шиклиъ), чухсагъул мялум апIури, видеора хътапIнийи. Гьелбетда, ухьу чухсагъулихъди ликар алдагъурадархьа, хъа вушра чпин разивалин лишан ву сарун. Дурари апIурайибдин ва шулайибдин багахь ухьу апIурайиб цIюмгъял вуда», – гъапнийи Сиражудин Сяидовди.

Макьалайин аьхириъ шаир-эскер Кьалухъ Мирзайин гафар кIваин апIури, пуз ккундузузки, чан ружихъ гюлле хъиврайи душмниз аьгъю ибшри, аьхирки цIайлапан чан хул’ин шлуб. Ихь баяриз хаин душманар гуршвуз ва дурарин пис юкIварик цIа кипуз кьувват туври!