ПОСЛЕДНИЙ НОМЕР
Свежий выпуск
Адашдин му гафар Мягьямедди кIваълан гьаундар. 2022-пи йисан июлин вазлиъ ихь уьлкейин кьушмари Луганскдин Халкьдин Республикайин Лисичанск шагьур ва дидин багарихь хьайи бицIи гъулар азад гъапIну. Думу гъизгъин женгариъ Ватанди чан улихь дивнайи вазифйир намуслувалиинди тамам апIбаз лигну, Мягьямед Аьлиевдиз «Дирбаш’вал улупбаз лигну» медаль тувну.
Мягьямед Аьлиев Табасаран райондин ТIаттил гъулаъ бабкан гъахьну. Мектебдиъ урхури имидитIан, думу эскрарин палатдиин юкIв алир, яракьарикан аьлава мялуматар гъадагъуз ккунир вуйи, гьаддиз думу, 2015-пи йисан мектеб ккудубкIубси, дишла Новосибирск шагьриъ авчйирин заан командованиейин училищейик урхуз кучIвну. Аьхирки, байвахтнахъанмина юкIв али ва чав кадабгънайи ляхнин рякъ дугъу Оренбург шагьриъ ккебгъру. Гьадлин думу миржиб вазлиз Таджикистандиз командировкайиз гьаъру.
Украинайин аьтрафариин гъябгъюрайи хусуси метлеб айи дявдин операцияйиъ Мягьямед садпи йигъариланмина иштирак шула. Дугъан гъуллугъра варитIан жавабдарвалиндарикан саб ву – думу авчйирин ротайин командир ву. Мягьямеддиз кьюб ражари зийнар гъахьну. Сабпи ражну гъиву гюлле дугъан арччулну хилик кубкIнийи. Зиян сагъ дапIну, саб бицIи вахтналан, июлин вазлиъ, Лисичанск шагьур азад апIурайиган, Мягьямеддин гагул хилиз гюлле кубкIнийи. Зиян дубхьнайир, бедендиан гъябгъюрайи ифдикан хабар дарди, думу душмнарихъди лап гъизгъин женгариъ учIвнади гъахьну. Дугъан хиликк ккайи авчийиз, фици чпин командир сабпну амрихъан гъягъюраш, гъяркъну, ва дугъу жара эскрарихъди Мягьямед хатIасуз йишвахьинди духну, дугъаз медицинайин кюмек апIуру. Зиян гъагъиб вуйивализ лигну, Мягьямед Аьлиев сифте Ростов шагьриз аьзарлуйирин госпитализ гъахуру, хъа сацIиб вахтаналан дугъан хил сагъ апIувал Саратовдиъ ерлешмиш дубхьнайи кьушмарин аьзарханайиъ давам апIуру.
Гележегдиъра Мягьямедди Ватандиз намуслувалиинди гъуллугъ апIрувалиин умудлу вуза фицики дугъаз нумуна чан адаш Артур Тажудинович Аьлиев ву. Дугъу, 25 йисан ихь ватанагьлийирин ислягьвал ва сабвал уьрхюри, Табасаран райондин айтIан ляхнариз лигру идарайиъ жюрбежюр гъуллугъариъ ляхин гъапIну, гьадму гьисабнаан 2006-2022-пи йисари Табасаран райондин РОВД-йин начальникдира. Гьелбетки, Мягьямеддиз тувнайи «Дирбаш'вал улупбаз лигну» медалик чан адашдинра аьхю пай ка. Ихь дирбаш ватанагьлийиз тербия туву, думу аьхю гъапIу абйир-бабариз аферин кIурхьа.