Гьелбетда, прямой эфир кIули гъубшу шубуб сяаьтнан арайиъ агьалйирихьан гъафи 4500-тIан артухъ суалариз жавабар тувуз даршлуб аьгъяхьуз, вушра глава дураригъян кми-кмиди текрар шулайи суалариз жавабар тувуз ва агьалйирик гизафси гъалабулугъвал кипрайи месэлйир гьял апIуз чалишмиш гъахьнийи.

Мягьячгъала шагьриъ дуланмиш шулайи ихь агъсакъал, отставкайиъ айи юстицияйин полковник, шаир, публицист Багъир Ражабовра рес-публикайин кIули айирихьна, гьаз шаирариз чпи гъидикIу китабарин гонорар туври имдарш, суал хьади илтIикIнийи.

– Гьамусяаьт кьюб китаб чапдиан адагъну, райондиз хъадаъназа. Гьадрариз гонорар тувиш, думу дакьатар Хив райондиъ чIур гъабхьи гъяд рас апIуз ва гьамусяаьт ихь ватандин саламатвал ва аку гележег бадали хусуси метлеб айи дявдин операцияйиъ иштирак’вал апIурайи баяриз кюмек вуди хътауз кьаст дапIназа, – гъапнийи агъсакъли.
Марцци кIваан вуйи яв мициб ниятназ чухсагъул, Багъир Ражабович. Гъит думу кIулиз удубчIври.

Мялум вуйиси, улихьна вахтари, Советарин Союздин девриъра, шаирариз ва писателариз чпи гъидикIу китабариз гьюкуматдин терефнаан гонорар туври гъахьнийиш, аьхиримжи вахтна му месэлайиз дикъат туври имдар. ДумутIанра савайи, шаирариз чпин китабар чпи иша ауб теклиф дивра. Саб гафниинди, гъийин девриъ, варибси, му циркилра рынокдин шартIариз илтIибкIна.
Ухьу литература, чIал артмиш дапIну ккуниваликан, дурарихьна жигьил наслин маракьлувал за апIуб чарасуз лазим вуйиваликан гизаф улхурахьа. Хъа чпин вахтра, дакьатарра харж дапIну, йис’ан йисаз цIийи китабар адагъурайи ихь шаирариз чпин зегьметнакан фицибкIа хайир аш-адарш, фикриз хурадархьа.

Мисалназ, А.С. Пушкинди чан яратмиш’валин уьмриъ гъазанмиш гъапIу пулин кьадар гъийин пулиинди 23 миллиондихьна шула. Гьелбетда, яратмиш апIру касдихьан чан гьевес пулиз дилигну артухъ вая цIиб апIуз шлуб дар, хъа вушра фунуб зегьметназра лайикьлу кьимат тувуб лазим ву.