Совещаниейиъ Дагъустандин гъулан мяишатдин ва ипIру-убхъру сурсатарин министри мялум гъапIганси, цци республикайиъ хьадукран вазари 225 агъзур гектарин хутIлариъ жюрбежюр тумар урзуз планламиш дапIна. Гьадму кьадарнакан 70 агъзур гектариъ тахил, 136,6 агъзур гектариъ мал-къарайиз вуйи алаф, 43,1 агъзур гектариъ мейвйир, 20,5 агъзур гектариъ картфар, 8,5 агъзур гектариъ бахчайин культурйир ва 7,2 агъзур гектариъ технический культурйир урзиди.

«Сач чвлин вазари кьюрдуз вуди гъурзу хутIларра гьисабназ гъадагъиш, 2023-пи йисан тумар урзурайи хутIларин кьадар 382 агъзур гектар шула. Му кьадар сачтIан 12 агъзур гектарин артухъди ву.

Гьацира Дагъустан Республикайиъ жюрбежюр мейвйир ва картфар киврайи хутIларин кьадарра йислан-йисаз артухъ апIура. Сач 45%-дихьнакьан артухъ гъапIну, хъа цци кIуруш, 15%-диинакьан за апIуз планариъ а», – гъапну министри.

Совещаниейиъ доклад урхувал давам апIури, Мухтарбий Аджековди республикайиъ артмиш шулайи багъманчивалин циркликанра мялуматар тувну. Дугъан гафариинди, гьаму йисан республикайиъ 1500 гектариъ жюрбежюр гъелемар кивуз планламиш дапIна. Гьадму кьадарнакан 1 агъзуртIан артухъ гектариъ аьмлюхъяр кивди.

Министри гъапиганси, аьмлюхъяр кивбан проект уьмриз кечирмиш апIурайи инвестори мидиз улихьна йисарира 1 агъзур гектариъ гьаму культурйир кивна. Гьаддиз, пуз шулуки, гьаму аьмлюхъярин багъ саб Урусатдиъ ваъ, хъа вари Европайиъ варитIан аьхюб хьибди.

«Гъийин йигъаз Дагъустан Республикайин урзру тумарихъди вуйи тяминвал 60%-тIан дар. Дагъустандиъ гъулан мяишат артмиш апIбак чпин пайра киврайи зегьметкешари чпиз тумар гьуркIну адарш, дурар республикайин айитIси, гъунши регионарианра масу гъадагъура.

Му аьгьвалат дигиш апIбан, яна, проектар уьмриз кечирмиш апIури, республикайиъ чан хусуси вуйи тумар хьпан бадали, республикайин бюджетдиан грантар жюрейиинди региондин илмин тешкилатариз дакьатар жара дапIну, 747 тонна мягьсуларин тумар ва 8 тонна мейвйирин тумар гьязур гъапIну.

Мидланра гъайри, гьаму йисан республикайин нежбрари, хутIларин бегьерлувал за апIбан бадали, 14 агъзур тонна минеральный удобренйир алахьуз планламиш дапIна. Гьацира, хьадукран ляхнар ккергъайиз, 2 агъзур аьдад гъулан мяишатдиъ ишлетмиш апIру техникара рас апIувалин ляхнар кIули гъягъюра. Ужудар гьавйир айи районариъ гьамусяаьт, хутIлар хъаъри ва тартиб апIури, 350 аьдад гъулан мяишатдин техникара либхура, хъа хайлин мяишатари, чпин хутIлар штухъди тямин апIувал себеб вуди, «Минмелиоводхоз РД» ФГБУ-йихъди йикьрарра йитIну ккудукIна.

Пуз ккундузузки, республикайин гъулан мяишатдиъ хьадукран вазари тамам дапIну ккуни ляхнар региондин Глава Сергей Меликовдин гюзчиваликкди кIули гъягъюра. Хъа республикайин гъулан мяишатдин ва ипIру-уьбхъру сурсатарин министерствойин терефнаан кIуруш, тамам дапIну ккуни ляхнар вахтниинди аьхирихъна хпан бадали, лазим вуйи уьлчмийир кьабул апIидича», – аьлава гъапIну Мухтарбий Аджековди.