ЦIийи 2023-пи йисан январин эвелариъ аьхълушнар гъахьи вахтна, республикайин гизаф агьалйир аквар, газар, манишин адарди гъузнийи. Сергей Меликовди думу ляхин тямин дарапIу тешкилатарин терефнаан хил алдабгъувал ккун гъапIнийи. «Гьар йисан аьхълушнар улуркьиган, республикайиъ гьамциб аьгьвалат арайиз гъюру. Багарихьди «Газпром» ва «Россети» компанйирин кIулиъ айидарихъди гюрюшмиш хьпанди вуза», – гъапнийи дугъу.

Гизаф суалар агьалйир штухъди тямин апIбаз бахш дапIнайи. Сергей Меликовди къайд гъапIганси, гьамусяаьт шид зигбан «Чиркей–Мягьячгъала–Каспийск» проект уьмриз кечирмиш апIура. Гьадму проектдин ляхнар ккудукIган, республикайин аьхю шагьрар штухъди тямин апIбан месэла гьял хьибди.

Прямой эфир гъябгъюрайи вахтна Мягьячгъалайиъ дуланмиш шулайи, жилир Урусатди кIули гъабхурайи хусуси метлеб айи дявдин операцияйин иштиракчи вуйи Асият региондин кIулиъ айирихьна илтIикIнийи. Дугъу Мягьячгъалайиъ чпи яшамиш шулайи райондиъ электричествойихъди тямин апIбан читинвалар айиваликан гъапнийи, ва цIийи трансформатор дивуз кюмек ккун гъапIнийи. Думу месэла гьял апIувал Сергей Меликовди республикайин энергетикайин ва ЖКХ-йин министр Манвел Мажонцдиз табшурмиш гъапIнийи.

Агьалйирин терефнаан транспортдин месэлара гъитIибккнийи. Республикайиъ туристарин кьадар артухъ дубхьнашра, Мягьячгъалайин аэропортдин пассажирар гъахру-хру жямяаьтлугъ транспорт гьамусра адар, хъа таксйир хъаърудари, асас вуди хьадан вахтна, кьиматар бегьемди за апIура.

Дербентдин агьалийи Мягьячгъалайиан Дербентдиз гъягъюрайи электричкйир артухъ апIувал, дурар кондиционерарихъди тямин апIувал ккун гъапIнийи. Сергей Меликовди думу месэлара фила гьял апIуруш, хъайи-хъайиси ктибтнийи.

Гьелбетда, зирзибил адабгъбан месэлара гъирагъдиъ гъубзундар. Гъулариъ хъархъас ямаж кайи йишваризди, нирин гъирагъаризди гатIабхьура. Сергей Меликовди къайд гъапIганси, республикайиъ экологияйин оператор тешкил дапIна. Гьюкуматдин думу компанияйи хъархъас тартиб апIру дараматар тикмиш апIбан проектар гьязур апIура. 2024-пи йисаз му хъархъсин месэла бегьемди гьял апIувал планламиш дапIна.

Гъяйтагъдиан вуйи дишагьлийи чан сакьат бицIириз кюмек апIувал ккун гъапIнийи, ерли гьякимари, дармнар адар дупну, кюмек апIури адруваликан дугъу аьрз гъапIнийи. Сергей Меликовди республикайин агьалйирин сагъламвал уьбхбан министр Татьяна Беляевайиз бицIириз кюмек апIбан, дармнарин кьитвалин месэла гьял апIбан табшуругъ тувнийи.

Табасаран райондиан вуйи Гюлишан Байрамовайи чан гизаф бицIидар айи хизандиз хулар тикмиш апIуз жилин участок жара апIбан месэла гьял апIбаз кюмек тувувал ккун гъапIнийи. Региондин Главайи думу месэла Табасаран райондин кIулиъ айи Мягьямед Къурбановдиз багахь вахтна гьял апIувал табшурмиш гъапIнийи. Гьаддихъди сабси, Сергей Меликовди, Табасаран райондиъ дицисдар хизанарин месэлйириз фикир тутрувди гъитри адруваликан къайд дапIну, учв суалниин мюгьтал духьнайиваликан гъапнийи.

Урусатдин Игит Нурмягьямед Гьяжимягьямедовдин дада Сапижат Мазаевайи региондин Главайин улихь, СВО-йиъ гъийихдарин гьюрмат уьбхюри, дурарин ччвурар шагьрарин ва районарин кючйириз тувну, дурар яшамиш гъахьи хуларик дурарин кIваин уьрхру тахтйир керхувалин теклиф дивнийи.

Сергей Меликовди, ихь ватандин маракьар уьрхюри, СВО-йиъ багахьлуйир гъийиху дагъустанлуйирин вари хизанариз башсагълугъвал ккун гъапIнийи. «Дурарин улихь ухьу гьарган буржлуди гъузди. Дурарикан гьарсар ухьуз игит ву», – гъапну Сергей Меликовди. Дагъустандиъ СВО-йин игитариз ядигар дивбанди ву. Гъийиху ихь эскрарин гьюрмат уьбхюри, дина кюкйир хуз хьибди.
Прямой эфириъ сабсан учIру месэла за дарапIди гъитуз гъабхьундар. Бабаюртдиан вуйи агьалийи чаз инвалидвал тувуз руш’ват гъадабгъурайивалин месэла гъитIибккнийи. Сергей Меликовди, къанун уьбхру органариз аьрза дюзди тувбан бадали, думу касдикан фукьан пул тIалаб гъапIнуш аьгъю апIувал ккун гъапIнийи. «ЧIяаьн ву дурар уьрхювал. Къанунариинди яшамиш хьуз дубгъуз вахт ву», – гъапнийи республикайин кIулиъ айири.

Гьелбетда, гьаму вари суаларин арайиъди Расул Гьямзатовдин юбилейдихъди аьлакьалу месэлара гъитIитIибккди гъитундар. «Юбилейдин сяргьятар Хунзахдиинди, Дагъустандиинди, Урусатдиинди ккудукIурадар. Думу вари дюн’яйиз машгьур кас ву. Р. Гьямзатовдин юбилей Ватандикан, Ватан уьбхрударикан вуйи дугъан шиърар артухъди лазим вуйи вахтна къайд апIурайивал ухьуз лишанлу ву», – гъапнийи Сергей Меликовди.

Региондин кIулиъ айири шубуб сяаьттIан артухъ вахтна суалариз жавабар тувнийи, хъа имбу суаларихъди, гъитIирккнайи месэлйирихъди таниш хьуз ва багарихьди лазим вуйи уьлчмйир кьабул апIуз гаф тувну.