КIваин апIуз ккундучуз, 2023-пи йисан январин 16-пи йигъан Хив райондин аьтрафариин али республикайин мяна айи рякъюн АрхътIарин гъяд гъутIубкIувализ дилигну, гъядлантина машинар хъаувал вахтназ вуди дебккнийи. Гъяд рас апIбан вари ляхнар «Стройлайн» ООО-йи кIули гъахура. Графикдиъ улупнайиганси, гъяд дибдиан рас апIбан ляхнар мартдин 28-пи йигъан ккудукIиди.
«Стройлайн» ООО-йин кIулин инженер Аьгьмед Гимбатовди мялум гъапIганси, гьамусяаьт АрхътIарин гъяд’ин вари ляхнар аьхю тажруба айи пишекрарин гюзчиваликкди ва лаборатория-йин ахтармишариинди, календарин графикдиз ва проектдиз тялукь вуди кIули гъахура.

«Гьамусяаьт бетондин ляхнар кIули гъахурача. Бетондин кьяляхъ саб жар гидроизоляция апIиди, хъасин сабсан ражну бетон улубзиди. Гьадму бетондин жар’ин – асфальт. Бетондин ери лабораторияйиъ ахтармиш апIиди ва гъядлантина машинар хъауз ихтияр тувди. Асфальт улубзбан кьяляхъ бетон ухди ебццуру, гъяд’ин илирчнайи бетондин шибарра заводдиъ гьязур гъапIдар ву. Учу гьацира гъяд’ин гъирагъдихъан инсанар гъягъру рякъра гьязур апIурача. Яягъди гъягърударин рякъ’инра бетон улубзуз планламиш дапIна.

Гьаму гъяд рас апIурайи вахтна ишлетмиш апIури гъабхьи кюгьне гъядуз гьюрмат улупури, думура рас алапIну, гъябгъюрайи хул экскаваторихьди дюз алапIурча. ВаритIан асасуб – ляхнин ери ву. ГъалатIар духьну ккундар – ягълишан аьхюб ву. Гъийин йигъаз гъяд рас апIбан 75 процент ляхнар ккудукIнача», – къайд гъапIнийи Аьгьмед Гимбатовди.
Дугъу гьацира Хив ва Агъул районарин ватандашарикан рякъюъди машин хъапIбан гьяракатнан къайда уьбхювал ккун гъапIнийи.