ПОСЛЕДНИЙ НОМЕР
Свежий выпуск
Конференция ачмиш апIури, управлениейин кIулиъ айи Каир Бабаевди къайд гъапIганси, ккудубшу йисан УФАС-дин гюзчиваликк ккайи цирк-лариъ 58 миллионна 100 агъзур манатдин журумар гъапIну ва гьацира жюрбежюр гъуллугъариъ айи 432 кас административ жавабдарвалихьна гъахьну, гьадму гьисабнаан 28 юридический ва 24 физический касар.
ГъапIу журумарин гьякьнаан улхури, Каир Бабаевди мялум гъапIганси, монополияйиз аькси вуйи къанун чIур апIбан гьякьнаан ккудубшу йисан 48,5 миллион манатдин журумар дапIна. 2021-пи йисандин улупбарихъди тевруш (54, 7 миллион манатдин журумар), мушваъ аьгьвалат дюз шула. Гьаму жюрейин натижйир госзакупкйир апIбан цирклиъра гъазанмиш дапIнача. Эгер 2021-пи йисан 13 миллион манатдин къанунсузвалар ашкар гъапIнуш, ккудубшу йисан думу цирклиъ гъапIу журумарин кьадар 5 миллион манатдин кам гъабхьну (8 миллион манат).
«Монополияйиз аькси вуйивал къайдайиз хпан бадали, ккудубшу йисан Дагъустандин УФАС-ди 9 дело гъитIирккну. Къанун чIур дапIну адрувализ лигну, дурарикан 2 дело хъяркьну, хъа гъузнайи 7 делойин гьякьнаан тялукь къарарар адагъну.
Мидланра гъайри, пуз ккундузузки, 2022-пи йисандин арайиъ республикайиъ алчагъвалиинди конкуренцияйин ляхин гъабхурайивалианра 2 делойиз гъилигну, аммаки, дурариан къарар адабгъайиз, айи нукьсанвалар терг гъапIну», – гъапну республикайин УФАС-дин кIулиъ айири.
Пресс-конференцияйиъ Каир Бабаевди госзакупкйирин цирклиъ гъахьи къанунсузваларин дюшюшарикан яркьуди ктибтну. Дугъан гафариинди, республикайиъ айи УФАС-диз сач тешкилатариъ ва идарйириъ жюрбюжюр дережайин шей’ар масу гъадагъбан гьякьнаан 1349 аьрза гъафну. Гьадрарикан 590 аьрза далил адру аьрз-йирси гьисаб гъапIну, 537 аьрза далил айи аьрзйирси, хъа 139 аьрза дурар тувдари кьяляхъ гъадагъну, ва гьацира 83 аьрза УФАС-дин комиссияйи кьяляхъ гъапIну.
РД-йин УФАС-ди 2022-пи йисан гъапIу ляхнин натижйириз бахш дапIнайи пресс-конференцияйиз уч духьнайи журналистари управление-йин кIулиъ айириз чпин суаларра тувнийи. Гьадрарикан саб, жюрбежюр машкврар улукьру вахтна, рес-публикайин алверчйири чпи масу туврайи сурсатарин кьиматар за апIурайивалихъди аьлакьалу вуйи. Му суалназ жаваб туври, Каир Бабаевди гьамци гъапну : «Эгер гьацдар дюшюшар ашкар шулаш, учу дид’ин гюзчивал гъабхурайи гъуллугъариз хабар дебккрача, фицики кьиматар айиганси гъитувал тIалаб апIбан ихтияр учуз адарчуз. Гьациб аьгьвалат инсанар гъахру маршруткйирин ва таксйирин цирклариъра а. Аммаки дид’ин гюзчивал гъабхувал ич ихтиярнаъ адар», – аьлава гъапIну Каир Бабаевди.