2022-пи йисан инженервалин сабпи классар улкейин президентдин къарарниинди ачмиш гъапIнийи. Техникайиин машгъул вуйи бицIидариз гьеле мектебдиъ урхури имиди гележегдиъ ктабгъру пишейихьна гьязур хьуз мумкинвал хьибди. Инженервалин классариъ гъурху бицIидарин аьгъювалари, гележегдиъ дурарикан му кеспнан эйсйир дархьишра, саризра манигъ’вал апIидар.

РФ-дин регионариъ инженервалин класс ачмиш апIбан бадали, техника-йиан заан пишекрариз кивру жюрейин дарсар ачмиш апIуб лазим ву. Гьаддиз мялимари «Авиамоделирование», «3D-моделирование ва 3D чап апIувал», «Лазерарин оптика», «Гьюлин робототехника ва гимйирин чешнйир апIувал» аьгъю дапIну ккунду.

Гьаму улихьна йигъари Дагъустан Республикайин образованиейин ва илимдин министерствойиъ уьмуми образованиейин тешкилатариъ инженервалин классар ачмиш апIбаз бахш дапIнайи совещание кIули гъубшну.

Серенжемдиъ РД-йин образованиейин ва илимдин министрин заместитель Аида Далгатова, региондин промышленностдин ва алвер апIбан министрин заместитель Гьяжимурад Исрапилов, республикайин образованиейин тешкилатарин вакилар иштирак гъахьнийи.

Уьмриз кечирмиш апIурайи проектдикан Аида Далгатовайи гьамцдар мялуматар тувнийи: «Инженервалин классарин метлеб – бицIидарин техникайин яратмишарихьна ва промышленностдихьна ккунивал артухъ апIувал ву. Учу, гьаму проект уьмриз кечирмиш апIбан бадали, Минпромторгдин ва Минобрнаукайин регьберваликкди промышленностдин карханйирин иштирак’валра тямин апIбанди вуча».

«Мектебариъ инженервалин классар ачмиш апIували техникайихъди аьлакьалу пишйирин адлувал за апIиди, мектебариъ урхурайидарин физика-йинна математикайин дарсарихьна вуйи маракьлувал артухъ хьуз гъибтди», - къайд гъапIну промышленностдин ва алвер апIбан министрин заместитель Гьяжимурад Исрапиловди.
Дугъан гафариинди, ихь уьлкейиин санкцйир иливнайи вахтна, конкуренцияйиъ дурум тувуз шлу техникайин алатар гьясил апIбан месэла учIруди дийибгъура. Думу месэла гьял апIбан бадали, республикайиз инженервалин пишейин сяняаьткрар чарасуз лазим ву.