Зиихъ улупу кьадар дакьатар 139 мектебдин арайиъ пай апIиди. Уьлкейин дибдиан рас апIбан ляхнар гъахбан программайиинди, мектебариъ дибдиан расвалин ляхнар гъахбаъ ихь республика улихь хьайидарин арайиъ ади кьюдпи йис ву. Дагъустандиз компьютерар, техника, жюрбежюр авадлугъар масу гъадагъуз аьлава вуди 1 миллиард манатсана жара апIиди.
Ягь’я Бучаевди гъапиганси, программа уьмриз кечирмиш апIувал гележедиъра давам хьибди. Дугъан гафариинди, РФ-дин мярифатнан министерствойи 2024-2025-пи йисари дибдиан расвалин ляхнар гъахру тешкилатарин терефнаан конкурсдиз дуфнайи аьрзйир гъядягъюз хъюгъна.

Расвалин ляхнар ктарди, гьаму йисан Дагъустан Республикайиъ тикмиш апIурайи цIийи 6 мектеб ачмиш апIбанди ву. Дурар Буйнакск райондин Апши гъулаъ (190 бицIириз йишв ади), Гъяйтагъ райондин Жавгъат гъулаъ ( 560 бицIириз йишв ади), Кьурагь райондин Аладаш гъулаъ (216 бицIириз йишв ади), Мягьярамкент райондин Самур гъулаъ (504 бицIириз йишв ади), Гумбет райондин цIийи Аргвани гъулаъ (250 бицIириз йишв ади), Казбек райондин Ленинаул гъулаъ (420 бицIириз йишв ади) ерлешмиш духьна.

Гьаму мектебар лихуз хъюгъбан кьяляхъ, 6 мектеб ва бицIидарин саб багъ тикилишчивалин ляхнар ккудукIну адру дараматарси гъузди. Ягь’я Бучаевди гъапиганси, тикилишчивалин ляхнар ккудукIну адру образованиейин дараматар республикайин инвес-тицйирин программайиинди тикмиш апIурайидар ву. Думу тикилишар региондин бюджетдиан финансарихъди тямин апIура.