Серенжемем ачмиш апIуз РД-йин Правительствойин председатель Аьбдулмуслим Аьбдулмуслимов, Дагъустандин гъулан мяишатдин ва ипIру-убхъру сурсатарин министр Мухтарбий Аджеков, республикайин промышленностдин министр Низам Халилов ва хъанара хайлин жара касар гъафнийи. Дагъустандиъ сабпи ражари вуди тешкил дапIнайи «ДагАгроКаспий» гъулан мяишатдин форум ачмиш апIури, Аьбдулмуслим Аьбдулмуслимов серенжемдиз ва дуфнайи хялариз республикайин Глава Сергей Меликовдин терефнаанра мани гафар гъапнийи.

Форумдиз уч духьнайидарин улихь чан удучIвну улхбаъ правительствойин председатели къайд гъапIганси, гъи ихь республика гъулан мяишат артмиш апIбан терефнаан Урусатдин кIакIначи регионарикан саб ву.

«Гъи Дагъустандин жилариин гьамциб яркьу форум тешкил апIбаз дидин тешкилатчйиризра чухсагъул мялум апIураза. Фицики дарарихьан ихь республикайиз гьамкьан карханйир жалб апIуз гъабхьну. Форум хьадукран ляхнар ккергърайи вахтна ухьхьан кIули гъабхуз гъабхьивали шад апIура», – гъапну РД-йин Правительствойин председатели.

Форумдин асас пайнан дахилнаъди Аьбдулмуслим Аьбдулмуслимовди, гъулан мяишат артмиш апIури, республикайин экономикайик чпин пай киврайи зегьметкешарра РД-йин Правительствойин грамотйириинди лишанлу гъапIну. Гьадрарин арайиъ Табасаран райондин ЦIанак гъулан агьали, «Дагфрут» ООО-йин директор Артем Рамазановра айи.

Къайд апIуб лазим вуки, думу касди Хили-Пенжигь ва ЦIанак гъуларин жилариин 25 гектартIар артухъ йишв’ин жвугърийирин ва беълийирин гизаф бегьер хру багъар кивна, ва гъюру йисан сабпи бегьерра уч апIиди.

Серенжемдин асас пай ккудубкIбалан кьяляхъ, форумдиз дуфнайи гьюрматлу хялар, гьарсаб карханайин сурсатар дивнайи палаткйириккна гъягъюри, мина духнайи сурсатарихъди таниш гъахьнийи. Му форумдиз набататар гьясил апIбаъ лазим вуйи, янаки кивру штиларин гъадабгъну, аьхю тракторариинакьан, вари шей’ар духнайи. Дурар вари гьаму деврин тIалабариз жаваб туврайидар вуйи.

Форумдиъ Ставропол крайдин «Щёлково Агрохим» ООО-йин главайин заместитель, гъулан мяишатдин илмарин доктор, ихь ватанагьли Бичехан Мисриевара иштирак шулайи. Чпи мина дубхнайи сурсатдин гьякьнаан мялуматар туври, дугъу узуз ктибтганси, дурарин ООО гъийин йигъан Урусатдиъ айи заан дережайин тумар гьясил апIурайи ва набататар уьзрарихьан уьрхбан сурсатар гьязур апIурайи анжагъ саб комплекс ву.

«Гъийин йигъан ихь гьюкуматдиъ санкцйирихъди вуйи аьгьвалат читинуб вуйивализ лигну, гъулан мяишатдин нежбрари асас вуди ич компанияйихъди ляхин гъабхура. Учу Дагъустандин саки вари районариз тумар гьязур апIурача. Кьибла Дагъустан гъадабгъиш, Дербент, Табасаран, СтIал Сумейман ва имбуну районарра тумарихъди тямин апIбааан кIакIначи компания «Щёлково Агрохим» ву. Урусатдин регионаризси, багахь хьайи гьюкуматаризра сурсат хътапIурача. 140 йисандин арайиъ тумар гьязур апIурайи ич заводдикан хабар адрур сарра адаршул. Эгер газат урхурайидарин учухьна суалар аш, дурарихьан йиз телефондин 8 928 590 62 22 нумрайиз илтIикIуз шулу», – кIура Бичехан Мисриевайи.

Форум кIули гъубшу кьюд йигъандин арайиъ республикайин саспи районариъ гьясил апIурайи сурсатарин выставкара гъабхьну. Форумдин хялар выставкайин сурсатарихъдира таниш гъахьнийи.
«ДагАгроКаспий» форумдин дахилнаъди жюрбежюр семинарарра, конференцйирра кIули гъушну.
Ужударстар мяишатар дипломариинди лишанлу апIбиинди форумдин ляхин аьхирихъди гъафну.