Заседаниейиъ иштирак шулайи депутатарилан савайи, серенжемдиз РД-йин Главайин Халкьдин Собраниейиъ айи вакил Нюсрет Уьмаровдиз, РД-йин юстицияйин министр Ханлар Пашабеговдиз, РД-йин спортдин ва физический культурайин министр Сажид Сажидовдиз, РД-йин Халкьдин Собраниейин депутат Алавудин Мирзабалаевдиз, жюрбежюр тешкилатарин, идарйирин ва гьацира интеллигенцияйин, предпринимателарин вакилариз теклиф дапIнайи.

Мягьямед Къурбановди чан удучIвну улхуб, Урусатди кIули гъабхурайи хусуси метлеб айи дявдин операцияйиъ гъийиху ихь ватанагьлийирин гьюрмат уьбхюри, саб дакьикьайиъ ккебехъну дийигъбалан ккебгънийи.

Райондин главайи чан доклад Табасаран райондин гъубшу йисандин яшайишдинна экономикайин артмиш’вализ, райондин администрацияйи образованиейин, сагъламвал уьбхбан, гъулан мяишатдин, культурайин, спортдин, рякъяр тикмиш апIбан, жигьиларин политикайин, туризмдин ва жара цирклариъ гъуху ляхнариз бахш дапIнайи.

«2022-пи йис, Урусатдин Федерацияйи хусуси метлеб айи дявдин операция гъабхуз хъюгъювалихъди аьлакьалу вуди, ихь уьлкейиз, республикайиз ва райондиз гъагъиб гъабхьну. Амма гьацдар читинвалар гъахьнушра, райондин артмиш’валин гьяракат яваш гъабхьундар, гизаф цирклариъ хъуркьувалар гъадагъуз мумкинвал гъабхьну», – къайд гъапIнийи Мягьямед Къурбановди.
Дугъан гафариинди, аьхиримжи йисари райондин аьтрафариин али рякъярин 90 километриин асфальт улубзну. Думу ляхин давам шула.

Йисандин арайиъ гъулан мяишатдин гьясиллувал 3 миллиард манатдиина за гъабхьну. Райондиъ тIумутIчивал, багъманчивал, парникариъ мейвйир гьясил апIувал гьяракатниинди артмиш шула. Райондиъ «Знак» СПоК-ди 1000 тоннайин мейвйир уьрхру йишв тикмиш дапIну, думу ачмиш апIувал – гъулан мяишат ужуди артмиш шулайивалин лишан ву.

Табасаран район инвестораризра кьабул дубхьна. Гъубшу йисан райондин экономикайиз дуфнайи инвестиц-йири 1,2 миллиард манаттIан артухъ тяйин дапIна. Агьалйирин игьтияжар гьуркIбан циркилра, иллагьки турист-вал, гьяракатниинди артмиш шула.

«Образованиейин циркил райондин гьюкмарин гюзчиваликк кка. Гъубшу йисан 6 мектебдиъ дибдиан расвалин ляхнар кIули гъухну, Туруф ва Хюрикк гъулариъ цIийи мектебар тикмиш апIура, Гюгьрягъ ва СертIил цIийи кьялан мектебар тикмиш апIуз проектар гьязур дапIну, дурар гьюкуматдин экспертизайи ахтармиш апIура.

Аьхиримжи йисари райондин медицинайин идарйирин материалинна техникайин бина къайдайиз гъюра, гьаддиинди духтрари аьзарлуйириз туврайи кюмекра ужуб терефнахъинди дигиш дубхьна. Райондин поликлиникайин цIийи дарамат тикмиш апIбан месэла РД-йин Главайин гюзчиваликк гъубзра», – давам гъапIнийи райондин кIулиъ айири.

Мягьямед Къурбановди уду-чIвну улхуб ккудубкIбан кьяляхъ, заседаниейиз уч духьнайидари дугъан доклад гьял гъапIнийи, ва Нюсрет Уьмаровди, Ханлар Пашабеговди, Сажид Сажидовди, райондин собраниейин депутатари, мектебарин директорари райондин администрацияйи гъубшу йисан гъапIу ляхниз кьимат тувнийи.
Депутатари сесер тувбан натижйириинди, 2022-пи йисан Табасаран райондин глава Мягьямед Къурбановдин регьберваликкди райондин администрацияйи кIули дубхнайи ляхин ужуб вуди гьисаб гъапIну.