«Кьибла Сухокумск шагьрин Уставдиз асас вуди, 2023-пи йисан 23-пи мартдиъ, сагъламвалин зяифвализ лигну, муниципалитетдин кIулиъ айи Аьбдуллагь Аьбдуллаев гъуллугънаан удучIвну. Шагьрин главайин вазиф-йир тамам апIувал улихьди главайин заместителди лихурайи Сеидягьмад Сефербегович Мамадовдиз табшурмиш дапIна. Гъи шагьрин аьгьвалат думукьан ужуб дар. Узу, Сеидягьмад Сефербеговичди улихьди ул’ан идипнайи экономикайин, яшайишдин ва жара цирклар къайдайиз хур кIури, умуд кивраза», гъапну Сергей Меликовди.

Табасаран райондин Гюгьрягъ гъулан агьали Сеидягьмад Мамадовди чан зигьметнан рякъ 2008-пи йисан Волгограддиъ айи Урусатдин МВД-йин Академия ккудубкIбалан кьяляхъ Дербент шагьрин ГОВД-йин силисчивалин отделиъ лихури ккебгъну. 2010-пи йисан думу Дагъустан Республикайин прокуратурайин органариъ лихуз хъюгъну. Дербент шагьрин прокурорин кюмекчиди, Табасаран райондин прокурорин заместителди гъилихну, саб кьадар вахтна гьадму райондиъ прокурорин вазифйир тамам апIури гъахьну. Гьаддин кьяляхъ Сеидягьмад Мамадов Дагъустан Республикайин прокуратурайин управлениейин отделин начальникди тяйин гъапIну.

2018-пи йисан январин вазлиъ Урусатдин Федерацияйин генеральный прокурорин приказдиинди 1-пи классдин юрист Сеидягьмад Мамадов 5 йисазди Кьибла Сухокумскдин прокурорин гъуллугъниин тяйин гъапIну. Гьаму йисан 7-пи мартдихъанмина думу Дагъустандин Главайин теклифчиди лихурайи.

«Табасарандин нурар» газатдин коллективди Сеидягьмад Мамадов заан гъуллугъниин дерккбахъди тебрик апIури, дугъаз жандин сагъ’вал, ляхниъ заан хъуркьувалар, кIваъ айи планар тамам апIувал ккун апIура.