ЦIийи отделение абццбаз бахш дапIнайи серенжемдиъ шагьрин главайин заместитель Видади Зейналов, депутатарин Собраниейин председателин заместитель Айваз Аьлиханов, Дербентдин ЦГБ-йин кIулин духтир Ислам Мурадов, нейрохирургияйин отделениейин заведующий Аьгьмед Иманшапиев ва жара касар иштирак гъахьну.

Серенжемдиъ удучIвну гъулхдарин гафариинди, цIийи отделение вари лазим вуйибдихъди тяминди ву. Палатйириъ аьзарлуйириз вари шартIарра яратмиш дапIна. «Саб Дербент шагьрин агьалйириз лигуз ваъ, хъа вари Кьибла Дагъустандин игьтияжар гьуркIуз мициб отделение хьпан лазимвал а», – гъапну Ислам Мурадовди.

Хусуси жюрейин иццрушнариз лигру му циркил ачмиш апIбан метлеб – агьалйир ярхлариз дурушри, заан технологияйин ва читин операцйир йишв’ин апIури, дурарин сагъламвал уьбхюз мумкинвал тувувал ву.