Совещание ачмиш апIури, Хив райондин глава Ярмет Ярметовди сабпи нубатнаъди гьял апIуз хьадукран призывдин кампанияйин месэла адабгънийи. Серенжемдиъ дугъу къайд гъапIганси, армияйиз гъагъру яшарихъ хъуркьнайи, хъа асас вуди урхбан заан ва кьялан идарйир ккудукIну, жюрбежюр пишйир гъадагънайи жигьиларин арайиъ ватанпервервалин тербия тувбан мялуматар тарагъну, профилактикайинна мялуматарин ляхин дубхну ккунду.

«Муниципалитетди призиывдин кампания заан дережайиъди тешкил дапIну, улихь дивнайи вари табшуругъар тамам апIуб лазим ву. Контрактдиинди военный гъуллугъназ кьабул апIувалра гьяракатниинди ва ачухъди кIули гъябгъюра. КIваин апIуз ккундузуз, контрактдиинди вуйи гъуллугъ жвуван хушниинди вуйиб ва тяйин дапIнайи маважиб кайиб ву», – къайд гъапIнийи муниципалитетдин главайи.

Аппаратдин совещаниейиъ гьял апIуз адагънайи асас месэлйирин арайиъ аьтрафар саб-сабдихьан жара апIурайи сяргьятар улупбан милли гъурулушдин гьякьнаан месэлара айи. Ярмет Ярметовдин гафариинди, эгер гъулан аьтрафар кьатI’иди жара дапIну, сяргьятар улупурайи генплан адарш, гъулан поселениейин гележегдин артмиш’вализ саб жюрейин кюмекра хьибдар.

Образованиейин месэлйирикан улхури, Ярмет Ярметовди Хив райондин образованиейин отделин начальник Назаряли Тарлановдикан райондин образованиейин цирклин вари идарйириъ штатарин оптимизация апIбан ляхин чан гюзчиваликкна гъадабгъуб табшурмиш гъапIну.

Райондин образованиейин отделин кIулин бухгалтер Нажмудин Мирзялиевди чан нубатнаъ Хив райондин мектебариъ классдин руководство гъабхбаз ва урхурайидариз мани хураг гьивуз жара апIурайи дакьатарикан мялуматар тувнийи. Дугъу къайд гъапIганси, классдин руководство гъабхбаз вуйи февраль вазлин пул йишвариина гъурубкьну ва баяр-шубариз мани хураг гьивуз жара дапIнайи дакьатарин гьякьнаан месэлйир арайиз гъафундар.

Райондин культурайин, спортдин ва туризмдин отделин начальник Казбек Къазиевди совещаниейиъ гъябгъюрайи йисан апрель вазлиъ Хив райондиъ кIули гъахуз планламиш дапIнайи культурайинна махлукьатлу серенжемарикан ктибтнийи. Дугъу мялум гъапIганси, апрелин вазлиъ райондиъ жигьиларин политикайин цирклиан «Хьадукран гьяфтайин уж’валар» акция гъабхувал планламиш дапIна. Думу серенжемариз, СВО-йиъ айи эскрарин хизанариз ва агьли касариз кюмек апIбан бадали, волонтерар жалб апIиди. Гьацира апрелин вазлиъ райондиъ «Милли Сес БицIидар – 2023 » конкурс гъабхуз гьязур шула.

Культурайин месэлйирин кьяляхъ совешаниейин иштиракчйири райондиъ субботникар тешкил апIбан, аьтрафар къайдайиз хпан, хьадукран чюлин ляхнар ккергъбан, ЖКХ-йин ва жара месэлйир гьял гъапIнийи.