Дагъустандин МВД-йин наркотикар тарагъбиин гюзчивал гъабхру управлениейин отделин кIулиъ айи Уьмаргьяям Уьмаровди къайд апIурайиганси, сифте наркодилерари жигьилариз, дурар аьхю маважиб кайи ляхниз кьабул апIурча кIури, кучIлар апIуру. КIваъ фукIара адру, амма сабишв’инди гизаф кьадар пул гъазанмиш апIуз ккуни живанар ва жигьилар, ляхин фтихъди аьлакьалу вуш ахтармиш дарапIди, рази шулу. Аьхириъ жигьилариз чпи ахъу рякъкан ва гъапIу тахсиркарваликан хабар гъабхьиган, наркодилерари, ляхин давам дарапIиш, ичв сир ачухъ апIурча ва полицияйин хилиз тувурча кIури, дурариз гучIар ккаъру.

«Вари фтилан ккебгъру гъапиш, гизафси наркодилерари мессенджерариъ, интернетдиъ саб гьяфтайиъ 100 агъзур манат маважиб рубкьру ляхин айиваликан мялуматар тарагъувалилан. Бязи инсанар, гьадму гьисабнаан яшнакк ккуркьну адрударра, му мялуматариин маракьлу шулу, ва чпизра хабар дарди, му къанунсуз бизнес кIули гъабхурайидарин асиллуваликк ккахьру. Наркотикарин рынокариъ агъавал апIурайи тIафлари дурарин фикрар бинайиан дигиш апIуру. Дустагъдиъ итбан гучI ккапIнайи жигьилар ва живанар дурарихъ лихури гъузуз мажбур шулу», – ктибтура Уь. Уьмаровди.

МВД-йин вакилари мициб читин аьгьвалатнаъ ахъу жигьилариз тахсиркрари, жвуваз файда ктабгъури, сир ачухъ апIбан гьякьнаан гучI ккаърайивализ фикир тутрувуб ва жвуву гъапIубдиин швумал гъахьивалин аьрза хьади полицияйиз гъюб теклиф апIура. Тахсир гардандиъ дибисну, чпин хушниинди гъафи жигьилариина уголовный дело гъитIибккудар. Хъа му тахсиркарвал апIбаз аьксиди уголовный дело гъитIибккиш, дидиз жазади саки 20 йисан дустагъ апIувал улупна. Гьаддиз жигьилар, уччвуди фикир дапIну, вахт-ниинди тахсиркарваларихьан ярхла духьну ккунду.

Къанун уьбхру органарин вакиларин гафариинди, чпин шил дибрихъбан бадали, тахсиркрари наркотикар жюрбежюр йишвариъ дивуз жара регионарианра кмиди инсанар жалб апIури шулу. Мисалназ, улихьнаси полицияйин вакилари Дербентдиъ Москвайиан Дербентдиз наркотик жини йишвариъ дивуз метлеб ади дуфнайи кьюр дишагьли 170 грамм героин хьади гъидисну. Дурариз телефондихъан Дербент шагьриъ героин дивру 180 адрес гъапнийи ва гьарсаб адреснаъ героин жин апIбаз 800 манат тувурча гъапнийи, ктибтура Уьмаргьяям Уьмаровди.

Гьяйифки, гъи наркобизнесдихъди аькси женг дубхну ккунидарра дидихъди аьлакьайиъ айивалин дюшюшар ашкар шула. Мисалназ, цIиб улихьнаси Къумторкъала райондин ЦIийи Согратл гъулан агьалйир къанун уьбхру органарин вакиларихьна илтIикIну ва чпин гъул наркотикар жин дапIну диврайи саб уьмуми аьхю йишваз илтIибкIнайиваликан мялумат тувну.
Полицияйин гъуллугъчйир йишв’ина гъушну ва саб жерге тахсиркрар гъидисну, гьадрарин гьисабнаъ МВД-йин вакиларра айи. Дурарихъди вуйи ляхин Дагъустандиъ айи МВД-йин хусуси хатIасузвал уьбхру управлениейи чаина гъадабгъну.

Уьмаргьяям Уьмаровдин фикриинди, наркотикар тарагъувализ аькси къанундиъ ижми дигиш’валар тIаъну ккунду. Дугъу наркотикар ишлетмиш апIурайидариина уголовный дело гъитIибккувалин теклифар дивра. «Гъийин йигъан наркотик ишлетмиш апIури гъидисдариз, административ жавабдарвалихъна духну, 4 вая 5 агъзур манат журум апIувал вая 2 суткайиъ дустагъдиъ итувал улупна. Къанунсузди наркотикар тарагъувалин гьяракатар, думу ишлетмиш апIурайидарин кьадар артухъ шулайи вахтна, къанундин му уьлчмйири цIибтIан мянфяаьт туврадар. Йиз фикриинди, наркотикар ишлетмиш апIурайидар уголовный жавабдарвалихъна духну ккунду», – къайд апIура Уь. Уьмаровди.