Дагъустан Республикайин яркврарин фонднаъ 624 агъзур гектар яркврар а. Кафари Кавказдин республикйирихь тевиган, Дагъустан варитIан цIибди яркврар айи йишв ву.
Гьар йисан хьадан мани вахт багахь шлуган, яркврарин мяшатдин гъуллугъчйир, яркврарик цIа кабхъувалин хатIасузвал уьбхюб ккун апIури, агьал-йирихьна илтIикIуру. Магьа майдин 17-пи йигъанра РД-йин яркврарин мяишатдин комитетдин председатель Вагьаб Аьбдулгьямидов республикайин СМИ-йин вакиларихъди гюрюшмиш гъахьну.

Ярквран мяишатдин комитетдин председателин гафариинди, Дагъустандиъ яркврар айи районар гизаф а. ВаритIан гизаф яркврар ЦIунтIа, ЦIумада, Тлярата районариъ а. ВаритIан яркур адру район Нугъай район ву. Вагьаб Аьбдулгьямидовди къайд гъапIганси, аьхирижи шубуд йисандин арайиъ республикайиъ яркврарик цIа кабхъувалин 30 дюшюш гьисабназ гъадагъна. Гьаму йисан яркврарик 2 ражари цIа кабхъну: Хасавюрт райондиъ ва Леваши райондин Къуппа гъулан яркврак. Хасавюрт райондиъ гъеебццу укIак цIа кабхънийи, диди аьхю зарар тувундар. Хъа Леваши райондиъ гизафси гьарарин кIакIар ургури гъахьну. Дициб цIа кабхъувалин натижайиъ 70-80 процент гьарар ерццуру.

«2018-пи йисан багарихьди вуйи 10 йисаз ярквран план тяйин гъапIнийи. Гьадму пландиъ кIули духну ккуни вари серенжемарикан ачухъди дупна. 2005 километр манзил айи 215 маршрут тяйин дапIна. Яркврарин мяишатдин гъуллугъчйири думу маршрутариъди ахтармишар гъахури ккунду. РД-йин яркврарин комитетдиз гьуркIну машинар адар, хъа машинар ашра, дурар гъягъру рякъяр адар. Гьаддиз мешебегйири, гъи саб терефназ, закур жара терефназ, саритI шубубпи терефназ гъягъюри, ахтармишар гъахуру. Аьхиримжи йисари яркврар цIа кабхъувалихьан уьрхбан сабсан месэла арайиз дуфна.Советарин Союздин девриъ жилин гьарсаб чIукI ишлетмиш апIуйи: тахил убзуйи, картфар кивуйи, укI убшвуйи. Гьамус гъулариъ гизаф йишвар ишлетмиш дарапIди дирчна. Яркур гъуларин багахьна гъюра. Гъулан гъирагъдиъ айи гъеебццу укIак цIа кипбаан ясана хатIасузвалин къайдйир дюрюрхювалиан цIа кабхъбан дюшюшар шулу, гьадрарилантина цIа ярквраризди гъябгъюру. Гизаф касари яркврариъ рягьятвал гъадабгъруган, алапIу цIа бегьемди ктIубшвурдар, гъузу аржлар микIлу ярхлаз гъахуру», – гъапнийи Вагьаб Аьбдулгьямидовди.
Гъеебццу укIак кабхъу цIа яркврариина дурубшбан бадали, Дагъустандин Правительствойи ярквран фонднан жиларихъди сатIи вуйи сяргьятар айи жил ишлетмиш апIурайи зегьметкешарикан профилактикайин серенжемар кIули гъахувал тIалаб апIура. Жикъиди кIуруш, гъирагъдиъ айи саб метрна гьацI жилиин гъеебццу укI гъидрибтувал, ясана жилин изан апIувал. Эгер жил хъапIуз техника адарш, 10 метр жилиин али укI дубшвну ккунду. Гьаму йисан республикайиъ 300 километр гьацдар хъаънайи зулар дапIну ккунду. Вари харжар жил ишлетмиш апIурайи зегьметкешарин гьисабнаан гъягъюру.

Вагьаб Аьбулгьямидовди гьарар битмиш апIру йишвар таза алаурайиваликанра гъапнийи. Мисалназ, Гъяякент райондиъ инсанари чпин хуларин улихь, гьяятариъ кивру уткан гьарар битмиш апIру йишв тикмиш апIбанди ву.
Пресс-конференцияйиъ журналистари саб жерге жара месэлйирирра гъитIирккнийи. РД-йин яркврарин мяишатдин комитетдин председатели вари суалариз гьуркIу жавабар тувнийи.