Выставкайиз Урусатдин 26 региондиан вуйи 90-тIан артухъ мяишатариан 30 жинсарин 450-тIан артухъ марччарна цIигьар духнайи. Мукьан гизаф кьадар чарвйири выставкайиъ иштирак’вал апIури, аьхиримжи 20 йисандин арайиъ сабпи раж ву. Асас вуди выс-тавкайиз духнайи чарвйир йиккун ва ужуб хьа али жинснандар вуйи. Вари Урусатдин жинснан чарвйирин ва цIигьарин выставкайиз сабпи ражари вуди Дагъустан Республикайи аьдати цигь ва дагъустандин сивун кьун селекцияйин жюрейиинди ктикьган арайиз гъафи, никк ккайи жинснан цIигьар духнайи. Къайд апIуб лазим вуки, аьхиримжи йисари ихь республикайиъ чарвйирин ва цIигьарин йиккун жинсар артмиш апIбаз асас фикир туври, му терефнаан аьхю ляхин гъабхура.

Му ражари выставкайиз чарвйирин хайлин цIийи жинсар духнайи. Дурарин арайиъ нобиан, кутумская ва мериноленда жинсарра айи.

Уч духьнайидар му йигъахъди тебрик апIури ва Дагъустандиз гъюбаз чухсагъул кIури, серенжемдиъ респуб-ликайин Глава Сергей Меликовдин терефнаан РД-йин Правительство-йин председатель Аьбдулмуслим Аьдулмуслимов удучIвну гъулхну.

«Гъи Дагъустандиъ вари Урусатдин жинснан чарвйиринна цIигьарин выс-тавка ачмиш дапIна. Думу выставкайиъ республикайианси, федеральный дережайин ва гьацира Урусатдин 26 региондиан хялар иштирак шула. Гъи ихь республикайиъ гьамциб серенжем кIули гъабхурайивалиин узу гизаф рази вуза, фицики Дагъустанди малдарвалин цирклиан ихь уьлкейиъ кIакIначи йишв дибисна. Гьамусяаьт дюн’яйиъ айи аьгьвалат читинуб вушра, чарвайин йикк гьясил апIбаан Дагъустан лап улихь хьа. Му терефнаан асас зегьмет зигурайидар гъулан мяишатдин зегьметкешар ву. Дурарик хъанара артухъси гьевес кубчIвбан бадали, ихь терефнаан ухьура кюмек апIидихьа», – дибикIнайи республикайин Главайихьан вуйи кагъзиъ.
Выставкайин иштиракчйирин улихь удучIвну гъулху Андрей Разинди гъапиганси, му серенжемдихьна республика лап кIваантIан гьязур гъабхьну, ва дугъу гьамци заан дережайиъди выставка кIули гъабхбаз дидин тешкилатчйириз чухсагъул мялум гъапIну.

Му жюрейин яркьу выставка Дагъустандиъ сабпи ражари вуди тешкил дапIнайиб ву. Дидин дахилнаъди 19-пи майдизкьан гьар йигъан жюрбежюр серенжемарра кIули гъягъюра.
Дагъустандиз му выставкайиз Луганскдин ва Донецкдин халкьарин республикйирианра, Ленинградский ва Волгоградский областарианра жинснан марччарна цIигьар духнайи.
Сабпи йигъан кIули гъушу серенжемарин дахилнаъди Дагъустандин гъулан мяишатдин ва ипIру-убхъру сурсатарин министр Мухтарбий Аджековди ва Крымдин Республикайин гъулан мяишатдин министр Андрей Савчукди малдарвалин цирклиан сатIиди ляхин апIбан йикьрарра гъийибтIнийи.

«Выставкайин дахилнаъди кьюбиб республикйирин арайиъ малдарвалин циркил артмиш апIбаан гъийитIу йикьрари регионарин аьлакьйирра артмиш апIуз мумкинвал тувди. Гъи Дагъустан Республика чарвйир уьрхбаан варитIан кIакIначи регион вуйивализ лигну, ухьуз айи таржубайихъди дурарра таниш апIуз шулу.
Сабсана пуз ккундузуз, Дагъустан ва Крым республикйирин табиаьтра сабсиб вуйивализ лигну, республикйирихьан агротуризм артмиш апIбаъра сар-сариз кюмек апIуз шулу», – къайд гъапIну Мухтарбий Аджековди.

Выставкайин кьюбпи йигъан ча-рвйир уьрхювалин циркил артмиш апIбаз бахш дапIнайи жюрбежюр гергми столар кIули гъушну.

Душвариъ гьял апIуз гъитIиркIу месэлйирин арайиъди хьа гьясил ва ишлетмиш апIувалин гьякьнаан вуйи месэла-йизра гъилигнийи.

Урусатдин ариш-вериш-чивалинна промышленностдин министерствойин пучIу промышленностдин департаментдин директор Вера Хмыровайи мялум гъапIганси, гьамусяаьт министерствойи, хьа масу тувбан аукционар ва сурсат масу тувбан аьлава серенжемар кIули гъахури, хьа масу тувбахъди аьлакьалу документарра къайдайиз хуз айи мумкинвалар агура.

Гергми столин заседаниейиъ иштирак гъахьи Урусатдин гъулан мяишатдин министерствойин малдарвалин ва жинснан ляхнарин департаментдин директор Дмитрий Бутусовди Урусатдиъ хьайихьна мюгьтаж’вал айиваликан думу гьясил апIурайидариз мялум дапIну ккунивализ фикир тувну. Дугъан теклифназ жаваб вуди, Дагъустандин промышленностдинна ариш-веришчивалин министр Низами Халиловди гьамусяаьт республикайиъ хьа гьясил апIбан карханйир тешкил апIуз кьюб аьхю проектар уьмриз кечирмиш апIурайиваликан мялум гъапIну ва цирклиз гьюкуматдин терефнаан кюмек ккуниваликан гъапну.

Выставкайиъ иштирак шулайи мяишатарин арайиъ конкурсра гъябгъюра. Яркьуди выставкайин натижйирикан газатдин гъюру нумрайиъ бикIидича.